مصر کی قومی ٹیم کا وطن واپسی پر شاندار استقبال

 قاہرہ: فیفا ورلڈکپ میں اپنی تاریخ کی بہترین کارکردگی دکھانے والی مصر کی قومی فٹبال ٹیم کی وطن واپسی پر مداحوں نے بھرپور استقبال کیا اور کھلاڑیوں کی کامیابی کا جشن منایا۔

رپورٹس کے مطابق ہزاروں شائقین قومی پرچم اٹھائے اور خیرمقدمی بینرز کے ساتھ شمالی ساحلی شہر العلمین کے بین الاقوامی ہوائی اڈے پر موجود تھے، جہاں انہوں نے ٹیم کا پرتپاک استقبال کیا۔

ورلڈکپ میں مصر نے پہلی بار ٹورنامنٹ کے ناک آؤٹ مرحلے، یعنی آخری 16 ٹیموں میں جگہ بنائی اور ایک میچ میں کامیابی بھی حاصل کی، جسے ملکی فٹبال کی اہم کامیابی قرار دیا جا رہا ہے۔

استقبال کے دوران مداحوں نے قومی ٹیم کے کپتان محمد صلاح کی تصاویر اٹھا رکھی تھیں اور ان کی خدمات کو خراجِ تحسین پیش کیا۔ بعد ازاں کھلاڑیوں نے اوپن ٹاپ بس میں نیو العلمین کی سڑکوں پر پریڈ کی، جہاں شہریوں کی بڑی تعداد نے ان کا استقبال کیا۔

رپورٹس کے مطابق صدر عبدالفتاح السیسی بھی قومی ٹیم اور کوچنگ اسٹاف سے ملاقات کریں گے تاکہ ٹورنامنٹ میں ٹیم کی کارکردگی کو سراہا جا سکے۔

اگرچہ مصر کو پری کوارٹر فائنل میں ارجنٹائن کے ہاتھوں 3-2 سے شکست کا سامنا کرنا پڑا، تاہم ٹیم کی مجموعی کارکردگی کو شائقین اور ماہرین نے سراہا ہے۔

ادھر مصری فٹبال فیڈریشن نے ہیڈ کوچ حسام حسن اور ان کے معاون ابراہیم حسن کے معاہدوں میں توسیع کا اعلان بھی کیا ہے، تاکہ قومی ٹیم کی حالیہ پیش رفت کا تسلسل برقرار رکھا جا سکے۔