فیفا ورلڈ کپ فائنل کا ٹکٹ 64 کروڑ روپے تک جا پہنچا
ری سیل مارکیٹ میں ٹکٹوں کی قیمتیں تقریباً 10 ہزار ڈالر سے شروع ہو رہی ہیں۔
نیویارک: فیفا ورلڈ کپ 2026 کے فائنل سے قبل ارجنٹینا اور اسپین کے درمیان ہونے والے تاریخی مقابلے کے ٹکٹوں کی قیمتیں غیر معمولی حد تک بڑھ گئیں، جس کے باعث شائقین میں شدید بحث چھڑ گئی ہے۔
میڈیا رپورٹس کے مطابق فیفا کے سرکاری ری سیل پلیٹ فارم پر بعض ٹکٹوں کی قیمت 23 لاکھ امریکی ڈالر (تقریباً 64 کروڑ پاکستانی روپے) تک جا پہنچی، جبکہ ری سیل مارکیٹ میں ٹکٹوں کی قیمتیں تقریباً 10 ہزار ڈالر سے شروع ہو رہی ہیں۔
رپورٹس کے مطابق لیونل میسی اور اسپین کے نوجوان اسٹار لامین یامال کی ممکنہ ٹکر نے شائقین کی دلچسپی میں بے پناہ اضافہ کیا، جس کے نتیجے میں فائنل کے ٹکٹوں کی طلب ریکارڈ سطح پر پہنچ گئی۔
فیفا کی مرکزی ٹکٹنگ ویب سائٹ پر فائنل کے تمام ٹکٹ فروخت ہو چکے تھے، جبکہ دستیاب ٹکٹ صرف ری سیل پلیٹ فارم پر انتہائی بلند قیمتوں پر نظر آئے۔
خبر رساں اداروں کے مطابق 48 ٹیموں پر مشتمل تاریخ کے سب سے بڑے ورلڈ کپ میں شائقین کی بھرپور دلچسپی دیکھنے میں آئی۔ گروپ مرحلے کے بیشتر میچز مکمل طور پر ہاؤس فل رہے، جبکہ باقی مقابلوں میں بھی نشستوں کی بڑی تعداد فروخت ہو گئی۔
ابتدائی مرحلے میں گروپ میچز کے ٹکٹ تقریباً 575 امریکی ڈالر میں فروخت کیے گئے تھے، تاہم فائنل قریب آنے کے ساتھ ری سیل مارکیٹ میں قیمتوں میں غیر معمولی اضافہ دیکھنے میں آیا۔
ماہرین کا کہنا ہے کہ محدود تعداد میں ٹکٹ جاری کرنے کی حکمت عملی، جسے “سلو ٹکٹنگ” کہا جاتا ہے، اور امریکا میں ٹکٹوں کی دوبارہ فروخت سے متعلق نسبتاً نرم قوانین نے بھی قیمتوں کو بلند کرنے میں اہم کردار ادا کیا۔
ادھر امریکی جریدے فوربس نے اپنی رپورٹ میں کہا ہے کہ فیفا ورلڈ کپ 2026 امریکا کی تاریخ کے مہنگے ترین کھیلوں کے ایونٹس میں شمار کیا جا رہا ہے۔ اس کے علاوہ فائنل کے میدان کی گھاس کے یادگاری ٹکڑے بھی سینکڑوں ڈالر میں فروخت کیے جا رہے ہیں، جس پر بعض شائقین نے اعتراضات بھی اٹھائے ہیں۔