فیفا ورلڈکپ،ارجنٹائن 90 منٹ میں گول پر شاٹ نہ لگانے والی پہلی ٹیم بن گئی

نیویارک: فیفا ورلڈ کپ 2026 کے فائنل میں اسپین نے دفاعی چیمپئن ارجنٹائن کو ایک صفر سے شکست دے کر 16 برس بعد دوسری مرتبہ عالمی ٹائٹل اپنے نام کر لیا۔ اس فتح کے ساتھ اسپین نے کئی نئے ریکارڈ بھی قائم کر دیے۔

فائنل میں ارجنٹائن کی ٹیم مقررہ 90 منٹ کے دوران گول پر ایک بھی شاٹ نہ لگا سکی، جس کے بعد وہ ورلڈ کپ فائنل کی تاریخ میں ایسا کرنے والی پہلی ٹیم بن گئی۔ شکست کے ساتھ ہی ارجنٹائن مسلسل دوسری بار عالمی چیمپئن بننے کا اعزاز برقرار رکھنے میں ناکام رہی۔

اسپین کی کامیابی میں گول کیپر کی شاندار کارکردگی نے اہم کردار ادا کیا۔ پورے ٹورنامنٹ کے دوران اسپین کے خلاف صرف ایک گول کیا گیا، جبکہ ٹیم اپنے تمام آٹھ میچز میں ناقابل شکست رہی۔

اس فتح کے بعد اسپین نے ایک منفرد عالمی اعزاز بھی حاصل کر لیا۔ اسپین اب بیک وقت مردوں اور خواتین دونوں کے فٹبال ورلڈ کپ کا عالمی چیمپئن بننے والا پہلا ملک بن گیا۔ اس سے قبل اسپین نے 2023 میں فیفا ویمنز ورلڈ کپ بھی اپنے نام کیا تھا۔

فائنل کے اختتام پر منعقدہ تقریب میں امریکی صدر ڈونلڈ ٹرمپ نے فاتح اسپین کو ورلڈ کپ ٹرافی پیش کی، جبکہ دونوں ٹیموں کے کھلاڑیوں میں انفرادی اعزازات بھی تقسیم کیے گئے۔

اسپین کی شاندار کارکردگی اور ناقابل شکست سفر کو ٹورنامنٹ کی نمایاں کامیابی قرار دیا جا رہا ہے، جبکہ فٹبال ماہرین نے ٹیم کی منظم دفاعی حکمت عملی اور مؤثر کھیل کو اس تاریخی فتح کی بنیادی وجہ قرار دیا ہے۔