فیفا فائنل کے بعد لامین یامال اور ٹرمپ کا مصافحہ موضوعِ بحث بن گیا

نیویارک: فیفا ورلڈ کپ 2026 کے فائنل کے بعد انعامات تقسیم کرنے کی تقریب میں اسپین کے نوجوان فٹبالر لامین یامال اور امریکی صدر ڈونلڈ ٹرمپ کے درمیان ہونے والا مصافحہ سوشل میڈیا پر توجہ کا مرکز بن گیا۔

وائرل ویڈیو میں دیکھا جا سکتا ہے کہ لامین یامال ٹرافی تقریب کے دوران امریکی صدر سے مصافحہ کرتے ہیں۔ تاہم سوشل میڈیا پر بعض صارفین نے ویڈیو کے چند لمحوں کی بنیاد پر یہ تاثر دیا کہ انہوں نے ابتدا میں مصافحے سے گریز کیا یا چند لمحوں کے لیے توقف کیا، جس کے بعد وہ آگے بڑھے اور ٹرمپ سے ہاتھ ملا لیا۔

ویڈیو کے حوالے سے مختلف آرا سامنے آ رہی ہیں، تاہم اس بات کی آزادانہ طور پر تصدیق نہیں ہو سکی کہ یہ توقف جان بوجھ کر تھا یا محض ایک معمول کا لمحہ۔ اس بارے میں لامین یامال یا ان کے نمائندوں کی جانب سے بھی کوئی باضابطہ وضاحت جاری نہیں کی گئی۔

Superstar Lamine 'initially refusing to shake Trump's hand' is viral

Is that how you see it? pic.twitter.com/dh6z9q46ji

— RT Intl (@RT_on_X) July 20, 2026

سوشل میڈیا پر بعض صارفین نے اس واقعے کو لامین یامال کے فلسطین کے حق میں سابقہ بیانات اور امریکی پالیسیوں سے جوڑنے کی کوشش کی، تاہم اس حوالے سے کوئی مصدقہ ثبوت یا سرکاری بیان سامنے نہیں آیا۔

یاد رہے کہ لامین یامال ماضی میں فلسطینی عوام سے اظہارِ یکجہتی کرتے رہے ہیں، جبکہ امریکہ اسرائیل کا قریبی اتحادی تصور کیا جاتا ہے۔ تاہم وائرل ویڈیو کے حوالے سے گردش کرنے والے دعووں کی تاحال آزاد ذرائع سے تصدیق نہیں ہو سکی۔