آئی سی سی نے 2027 ورلڈ کپ کے لیے سپر سیریز فارمیٹ کا دفاع شروع کر دیا

دبئی: انٹرنیشنل کرکٹ کونسل (آئی سی سی) نے 2027 ون ڈے ورلڈ کپ کے لیے متعارف کرائے گئے نئے “سپر سیریز” فارمیٹ کا دفاع کرتے ہوئے کہا ہے کہ یہ نظام عالمی مقابلے کو مزید بہتر بنانے کے لیے تیار کیا گیا ہے۔

آئی سی سی کے نئے فارمیٹ پر کرکٹ حلقوں کی جانب سے تنقید کی جا رہی ہے۔ اس فارمیٹ کے تحت کم رینکنگ رکھنے والی تین ٹیمیں ابتدائی مرحلے میں حصہ لیں گی، جبکہ دو ٹیمیں صرف دو میچز کھیلنے کے بعد ایونٹ سے باہر ہو جائیں گی۔

ذرائع کے مطابق آئی سی سی کے ورکنگ گروپ نے 2027 ورلڈ کپ کے لیے ٹیموں کی تعداد محدود رکھنے کی تجاویز پر بھی غور کیا تھا۔ 2019 اور 2023 ورلڈ کپ کی طرح 10 ٹیموں پر مشتمل فارمیٹ کی تجویز بھی زیر بحث آئی، جسے بعض اراکین کی حمایت حاصل تھی۔

تاہم آئی سی سی نے پہلے سے منظور شدہ 14 ٹیموں کے فارمیٹ کو برقرار رکھنے کا فیصلہ کیا اور اس میں معمولی تبدیلیاں کی گئیں۔

کرکٹ ماہرین کے مطابق نئے فارمیٹ کا مقصد زیادہ ٹیموں کو عالمی سطح پر موقع دینا ہے، تاہم اس کے طریقہ کار پر مزید بحث جاری ہے۔