تیل تنصیبات پر ڈرون حملوں کے بعد سعودی عرب اور امریکا کا عراق میں فضائی حملہ

سعودی وزارت دفاع کے مطابق امریکی سینٹرل کمانڈ (سینٹ کام) کے تعاون سے عراق میں ایران سے منسلک مسلح گروپوں کے مبینہ ٹھکانوں کو نشانہ بنایا گیا۔ وزارت دفاع کا کہنا ہے کہ یہ کارروائی سعودی تیل تنصیبات پر حالیہ ڈرون حملوں کے جواب میں کی گئی۔

بیان کے مطابق ایران نواز گروپوں نے سعودی توانائی کے اہم مراکز کو نشانہ بنانے کی کوشش کی تھی، تاہم سیکیورٹی فورسز نے بروقت کارروائی کرتے ہوئے عراق سے آنے والے متعدد ڈرون ہدف تک پہنچنے سے پہلے ہی تباہ کر دیے۔

دوسری جانب امریکی سینٹ کام نے بھی ایکس پر جاری اپنے بیان میں تصدیق کی کہ امریکا اور سعودی عرب نے مشترکہ کارروائی کے دوران عراق میں ایران سے وابستہ مسلح گروہوں کے مراکز کو نشانہ بنایا۔

سینٹ کام کے مطابق ان گروہوں پر الزام ہے کہ وہ امریکی افواج اور سعودی عرب کے توانائی کے بنیادی ڈھانچے پر حملوں کی تیاری کر رہے تھے۔ امریکی فوج کا کہنا ہے کہ مشترکہ کارروائی کے نتیجے میں ممکنہ حملوں کا منصوبہ ناکام بنا دیا گیا۔

اس پیش رفت کے بعد خطے میں کشیدگی میں مزید اضافے کے خدشات ظاہر کیے جا رہے ہیں، جبکہ تاحال ایران یا عراق کی جانب سے اس کارروائی پر کوئی باضابطہ ردعمل سامنے نہیں آیا۔