بنگلادیشی حسن محمود کی تباہ کن بولنگ، آسٹریلیا 198 رنز پر ڈھیر

ڈارون میں بنگلادیش اور آسٹریلیا کے درمیان سیریز کے پہلے ٹیسٹ میں بنگلادیشی فاسٹ بولر حسن محمود نے شاندار کارکردگی کا مظاہرہ کرتے ہوئے آسٹریلوی بیٹنگ لائن کو مشکلات سے دوچار کردیا۔ آسٹریلوی ٹیم پہلی اننگز میں 198 رنز بناکر آل آؤٹ ہوگئی۔

آسٹریلیا نے ٹاس جیت کر پہلے بیٹنگ کا فیصلہ کیا۔ اوپنرز نے 45 رنز کی شراکت قائم کی، تاہم اس کے بعد بنگلادیشی بولرز نے مسلسل وکٹیں حاصل کرتے ہوئے آسٹریلوی بیٹنگ پر دباؤ بڑھا دیا۔

74 رنز کے مجموعی اسکور تک جیک ویدرالڈ 23، ٹریوس ہیڈ 22، کیمرون گرین 13 اور مارنس لبوشین ایک رن بناکر پویلین واپس لوٹ گئے۔

اس کے بعد اسٹیو اسمتھ اور ایلکس کیری نے 55 رنز کی شراکت بنا کر اننگز کو سنبھالنے کی کوشش کی، تاہم 129 کے مجموعی اسکور پر ایلکس کیری 19 رنز بناکر آؤٹ ہوگئے۔

اسٹیو اسمتھ نے ایک اینڈ سنبھالے رکھا اور 71 رنز کی عمدہ اننگز کھیلی، لیکن دوسرے اینڈ سے وکٹیں گرنے کا سلسلہ نہ رک سکا۔ بیو ویبسٹر 12، کپتان پیٹ کمنز 9، نیتھن لیون 7 اور مچل اسٹارک ایک رن بناسکے۔

بنگلادیش کی جانب سے حسن محمود نے 55 رنز دے کر 6 وکٹیں حاصل کیں، جبکہ تسکین احمد اور عبادت حسین نے 2،2 کھلاڑیوں کو آؤٹ کیا۔

اس کارکردگی کے ساتھ بنگلادیشی فاسٹ بولرز نے دوسری مرتبہ کسی ٹیسٹ اننگز میں آسٹریلیا کی تمام 10 وکٹیں اپنے نام کی ہیں۔

حسن محمود کی 55 رنز کے عوض 6 وکٹیں بنگلادیشی فاسٹ بولر کی جانب سے ٹیسٹ کرکٹ میں تیسری بہترین انفرادی بولنگ کارکردگی بھی قرار دی جارہی ہے۔