آئی سی سی کرکٹ ورلڈ کپ 2027 کے شیڈول اور گروپس کا اعلان، پاکستان اور بھارت ایک ہی گروپ میں شامل

انٹرنیشنل کرکٹ کونسل (آئی سی سی) نے کرکٹ ورلڈ کپ 2027 کے شیڈول اور گروپس کا باضابطہ اعلان کر دیا ہے جس کے مطابق روایتی حریف پاکستان اور بھارت کی ٹیمیں ایک بار پھر ایک ہی گروپ میں شامل ہیں۔ میگا ایونٹ رواں برس کے اواخر میں 2 اکتوبر سے 21 نومبر تک جنوبی افریقا، زمبابوے اور نمیبیا کی میزبانی میں کھیلا جائے گا۔

دستاویزات اور جاری کردہ شیڈول کے مطابق ٹورنامنٹ میں شامل ٹیموں کو دو گروپس میں تقسیم کیا گیا ہے۔ گروپ اے میں پاکستان، بھارت، آسٹریلیا، افغانستان، زمبابوے اور ایک کوالیفائر ٹیم کو شامل کیا گیا ہے جبکہ گروپ بی میں انگلینڈ، جنوبی افریقا، سری لنکا، بنگلادیش، نیوزی لینڈ اور دوسری کوالیفائر ٹیم مد مقابل ہوں گی۔

تفصیلات کے مطابق قومی کرکٹ ٹیم ورلڈ کپ میں اپنی مہم کا آغاز 8 اکتوبر 2027 کو افغانستان کے خلاف میچ سے کرے گی۔ ایونٹ کا سب سے بڑا اور روایتی حریفوں کے درمیان میچ 10 اکتوبر 2027 کو جوہانسبرگ میں کھیلا جائے گا۔ اس کے بعد پاکستانی ٹیم 15 اکتوبر کو کوالیفائر ٹیم، 19 اکتوبر کو زمبابوے اور 22 اکتوبر کو آسٹریلیا کے خلاف میدان میں اترے گی۔

ٹورنامنٹ کے سیمی فائنل مقابلے 17 اور 18 نومبر کو کھیلے جائیں گے جبکہ عالمی کپ کا فائنل معرکہ 21 نومبر 2027 کو جوہانسبرگ کے میدان پر سجے گا جہاں دنیا کو نیا کرکٹ چیمپئن ملے گا۔