سعودی وزیر دفاع کے امریکی اور فرانسیسی هم منصبوں سے اہم رابطے

ریاض (نیوز ڈیسک) سعودی وزیر دفاع شہزادہ خالد بن سلمان نے امریکی اور فرانسیسی وزرائے دفاع کے ساتھ ٹیلیفونک رابطے کیے ہیں جن میں علاقائی سلامتی، باہمی دفاعی شراکت داری اور عالمی امن کے فروغ پر تفصیلی تبادلہ خیال کیا گیا۔

خبر ایجنسی کی رپورٹ کے مطابق سعودی وزیر دفاع نے امریکی وزیر دفاع پیٹ ہیگستھ سے گفتگو کرتے ہوئے سعودی امریکا دفاعی تعلقات کو مزید مستحکم کرنے اور علاقائی استحکام کو یقینی بنانے کے امور پر زور دیا۔ اس کے علاوہ انہوں نے فرانسیسی وزیر مسلح افواج کیتھرین ووٹرین سے بھی ملاقات کی، جس میں دفاعی تعاون اور خطے کو درپیش سلامتی کے چیلنجز کا احاطہ کیا گیا۔

سرکاری ذرائع کے مطابق ان سفارتی رابطوں کے دوران سعودی وزیر دفاع نے امریکی اور فرانسیسی حکام پر واضح کیا کہ عالمی امن اور خطے کے تحفظ کے لیے مشترکہ اور فوری اقدامات ناگزیر ہیں۔ یہ رابطے ایسے وقت میں سامنے آئے ہیں جب سعودی عرب کو یمن کی جانب سے حوثی گروپ کے میزائل اور ڈرون حملوں کا سامنا ہے، جس کے پیش نظر ریاض خطے میں سفارتی اور دفاعی تعاون کو وسعت دینے کی کوشش کر رہا ہے۔

دریں اثنا، سعودی ولی عہد اور وزیراعظم شہزادہ محمد بن سلمان اور متحدہ عرب امارات کے نائب صدر شیخ منصور بن زاید آل نہیان کے درمیان ریاض میں اہم ملاقات بھی ہوئی ہے۔ سرکاری میڈیا کے مطابق اس اعلیٰ سطح ملاقات میں دونوں برادر ممالک کے باہمی تعلقات اور خطے کی تازہ ترین صورتحال کا جائزہ لیا گیا۔ سیاسی تجزیہ کاروں کا کہنا ہے کہ یہ تمام سفارتی سرگرمیاں خطے میں امن کی بحالی اور مشترکہ لائحہ عمل طے کرنے کی جانب ایک اہم قدم ہیں۔