حکومت نے جان بوجھ کر مذاکرات میں ڈیڈلاک پیدا کیا، شوکت یوسفزئی

حکومت نے جان بوجھ کر مذاکرات میں ڈیڈلاک پیدا کیا، اب حالات خراب ہوئے تو ذمہ داری بھی حکومت پر ہوگی، تحریک انصاف کے رہنما شوکت یوسفزئی نے حکومت پر مذاکرات ناکام بنانے کا الزام عائد کرتے ہوئے سخت ردعمل دے دیا۔

شوکت یوسفزئی نے اپنے بیان میں کہا کہ ملک کو موجودہ مشکلات سے نکالنے کے لیے حکومت کو مذاکرات میں لچک کا مظاہرہ کرنا چاہیے تھا، تاہم حکومتی رویے سے مایوسی ہوئی۔ ان کے مطابق حکومت کے پاس دہشت گردی اور معاشی بحران سے نمٹنے کے لیے واضح حکمت عملی نظر نہیں آ رہی۔

انہوں نے کہا کہ ضد اور انا کی بنیاد پر ملک نہیں چلائے جا سکتے، حکمرانوں کو موجودہ صورتحال کا سنجیدگی سے جائزہ لینا چاہیے۔ ان کا کہنا تھا کہ خیبر پختونخوا میں ایمرجنسی یا گورنر راج کے نفاذ سے حالات مزید پیچیدہ ہوسکتے ہیں۔

شوکت یوسفزئی نے دعویٰ کیا کہ حکومت نے جان بوجھ کر مذاکرات کو ناکام بنایا، جبکہ اپوزیشن نے بات چیت کے عمل میں حصہ لے کر اپنا کردار ادا کیا۔ انہوں نے کہا کہ حکومت پہلے تحریک انصاف پر مذاکرات سے گریز کا الزام عائد کرتی رہی، لیکن جب تحریک انصاف مذاکرات کی میز پر آئی تو حکومت پیچھے ہٹتی دکھائی دی۔

ان کا کہنا تھا کہ تحریک انصاف کے مطالبات آئینی اور قانونی نوعیت کے ہیں اور حکومت کو بانی پی ٹی آئی سے ملاقات کی اجازت دینی چاہیے۔ انہوں نے مزید کہا کہ دہشت گردی کے خاتمے کے لیے وفاقی حکومت کو خیبر پختونخوا حکومت کے ساتھ مل کر مشترکہ حکمت عملی بنانی چاہیے۔

سیکریٹری اطلاعات پی ٹی آئی خیبر پختونخوا نے اعلان کیا کہ تحریک انصاف کا لانگ مارچ آج سے شروع ہوگا اور اپوزیشن کے مطالبات تسلیم ہونے تک احتجاجی سلسلہ جاری رکھا جائے گا۔

واضح رہے کہ حکومت اور اپوزیشن کے درمیان اسپیکر قومی اسمبلی ایاز صادق کی زیر صدارت مذاکرات کے دو دور ہو چکے ہیں، تاہم گزشتہ روز ہونے والا دوسرا دور بھی کسی حتمی نتیجے کے بغیر ختم ہوگیا تھا۔