وزیراعلیٰ خیبرپختونخوا کا ہیلی کاپٹر کے ذریعے لکی مروت پہنچنا، پی ٹی آئی لانگ مارچ میں خارجی دہشتگردوں کی موجودگی کا انکشاف

اسلام آباد ہائیکورٹ کے واضح احکامات کو پسِ پشت ڈالتے ہوئے وزیراعلیٰ خیبرپختونخوا سہیل آفریدی سرکاری ہیلی کاپٹر کے ذریعے لکی مروت پہنچ گئے، جہاں انہوں نے پاکستان تحریک انصاف کے لانگ مارچ کی قیادت کی۔ اس اقدام پر وفاقی حکومت اور سیاسی حلقوں کی جانب سے شدید ردعمل کا اظہار کیا گیا ہے۔

ذرائع ابلاغ اور انٹیلیجنس رپورٹس کے مطابق اسلام آباد ہائیکورٹ نے 18 ستمبر کو 37 صفحات پر مشتمل تفصیلی فیصلہ جاری کیا تھا، جس میں صوبائی حکومتوں اور وزرائے اعلیٰ کو واضح طور پر ہدایت کی گئی تھی کہ وہ کسی بھی سیاسی مارچ یا احتجاج کے لیے سرکاری فنڈز، گاڑیوں، ہیلی کاپٹر، یا سرکاری عملے کا استعمال نہ کریں۔ عدالتی فیصلے میں پرامن احتجاج کو آئینی حق قرار دیا گیا تھا لیکن اس کے ساتھ ہی یہ بھی پابندی عائد کی گئی تھی کہ احتجاج میں اسلحہ لانے کی ہرگز اجازت نہیں ہوگی۔

انٹیلیجنس ذرائع کا کہنا ہے کہ سوشل میڈیا پر گردش کرنے والی تصاویر میں پی ٹی آئی لانگ مارچ کے شرکاء میں اسالٹ رائفلز سے لیس مسلح افراد کی موجودگی واضح دیکھی گئی ہے۔ انٹیلیجنس ذرائع کے مطابق تصاویر میں اسلحے کے ساتھ نظر آنے والے ایک شخص کی شناخت خارجی گل بہادر گروپ کے اہلکار خارجی شہیداللہ عرف غازی کے طور پر کی گئی ہے۔ دستاویزی اور انٹیلیجنس رپورٹس کے مطابق شناخت ہونے والا یہ شخص مکین کا رہائشی ہے اور متعدد دہشت گرد حملوں میں ملوث رہا ہے، جبکہ مارچ کی آڑ میں چھپے دیگر دہشت گردوں کی نشاندہی کا عمل بھی جاری ہے۔

وفاقی وزیر داخلہ محسن نقوی نے سماجی رابطے کے پلیٹ فارم ایکس پر ایک ویڈیو شیئر کرتے ہوئے وزیراعلیٰ خیبرپختونخوا کے اس اقدام پر کڑی تنقید کی ہے۔ انہوں نے طنزیہ بیان میں کہا کہ سہیل آفریدی کا پشاور سے لکی مروت تک ہیلی کاپٹر کا سفر بلاشبہ کسی سرکاری کام کے لیے ہوگا اور اس کا تعلق سکیورٹی صورتحال یا انسداد دہشت گردی سے ہوگا۔ دوسری جانب گورنر خیبرپختونخوا فیصل کریم کنڈی نے بھی تصدیق کی ہے کہ وفاقی وزیر داخلہ سے ملاقات میں سرکاری وسائل کے اس بے دریغ استعمال پر تفصیلی تبادلہ خیال کیا گیا ہے، جو عدالتی احکامات کی صریح خلاف ورزی ہے۔

دوسری جانب لکی مروت سے شروع ہونے والا پی ٹی آئی کا یہ لانگ مارچ کرک میں رات گزارنے کے بعد کوہاٹ کی طرف روانہ ہو رہا ہے۔ اطلاعات کے مطابق کوہاٹ پہنچنے پر وزیراعلیٰ سہیل آفریدی کارکنان سے خطاب کریں گے، جہاں رکن قومی اسمبلی شہریار آفریدی ان کا استقبال کریں گے۔ پی ٹی آئی قیادت کا کہنا ہے کہ چارسدہ اور صوابی پہنچنے پر آئندہ کے لائحہ عمل کا باضابطہ اعلان کیا جائے گا۔