حکومت نے پیٹرول مہنگا اور ہائی اسپیڈ ڈیزل سستا کردیا

اسلام آباد (نیوز ڈیسک) وفاقی حکومت نے پیٹرولیم مصنوعات کی قیمتوں میں ردوبدل کا اعلان کرتے ہوئے پیٹرول کی فی لیٹر قیمت میں مزید اضافہ کر دیا ہے جبکہ ہائی اسپیڈ ڈیزل کی قیمت میں کمی کی گئی ہے۔

پیٹرولیم ڈویژن کی جانب سے جاری کردہ نوٹیفکیشن کے مطابق اوگرا نے حکومتی پیٹرولیم پرائسنگ میکنزم کے تحت قیمتوں میں ردوبدل کیا ہے۔ جاری کردہ دستاویز کے مطابق پیٹرول کی قیمت میں 1 روپے 82 پیسے فی لیٹر کا اضافہ کیا گیا ہے، جس کے بعد پیٹرول کی نئی ایکس ڈپو قیمت 396 روپے 65 پیسے فی لیٹر ہو گئی ہے۔

دوسری جانب ہائی اسپیڈ ڈیزل کی قیمت میں 91 پیسے فی لیٹر کمی کی گئی ہے، جس کے نتیجے میں ڈیزل کی نئی قیمت 394 روپے 94 پیسے فی لیٹر مقرر کی گئی ہے۔ پیٹرولیم ڈویژن کے اعلامیے میں واضح کیا گیا ہے کہ ان نئی قیمتوں کا اطلاق 8 اکتوبر 2026 کے لیے ہو گا۔

حکام کا کہنا ہے کہ اعلان کردہ قیمتیں عالمی مارکیٹ میں پیٹرول اور ڈیزل کی قیمتوں سے براہ راست منسلک ہیں۔ عالمی مارکیٹ میں ہونے والی تبدیلیوں، پلاٹس ریٹس، پریمیم اور دیگر اخراجات کے تناظر میں پٹرولیم مصنوعات کی قیمتوں میں یہ ردوبدل کیا گیا ہے۔