اسٹیو اسمتھ سر پر گیند لگنے سے زخمی،دوسرے ٹیسٹ میں شرکت مشکوک

آسٹریلیا کے مایہ ناز بلے باز اسٹیو اسمتھ جنوبی افریقا کے خلاف پہلے ٹیسٹ میچ کے چوتھے روز بیٹنگ کے دوران سر پر گیند لگنے سے زخمی ہوگئے، جس کے بعد دوسرے ٹیسٹ میں ان کی شرکت کے حوالے سے سوالات اٹھنے لگے ہیں۔

ڈربن میں جاری میچ کے دوران یہ واقعہ اس وقت پیش آیا جب جنوبی افریقی فاسٹ بولر اینرک نورکیا کی تیز باؤنسر اسمتھ کے ہیلمٹ پر لگی اور گیند فائن لیگ کی جانب چلی گئی۔

واقعے کے فوراً بعد آسٹریلوی ٹیم کے فزیو اور ڈاکٹر نے میدان میں اسٹیو اسمتھ کا معائنہ کیا، جبکہ احتیاطی طور پر ان کا ہیلمٹ بھی تبدیل کیا گیا۔

اسمتھ نے طبی معائنے کے بعد بیٹنگ جاری رکھی اور 41 گیندوں پر 27 رنز بنائے، تاہم بعد ازاں سائمن ہارمر کی گیند پر لانگ آن کے فیلڈر کے ہاتھوں کیچ آؤٹ ہوگئے۔

آسٹریلیا کی جانب سے جنوبی افریقا کی دوسری اننگز کے آغاز پر اسٹیو اسمتھ میدان میں نظر نہیں آئے اور ان کی جگہ مائیکل نیسر نے فیلڈنگ کی۔

رپورٹس کے مطابق ابتدائی طور پر اسمتھ میں دماغی چوٹ یا کنکشن کی تشخیص نہیں ہوئی تھی، تاہم مزید طبی معائنے کے بعد ہی ان کی آئندہ میچ میں شرکت کے بارے میں حتمی فیصلہ متوقع ہے۔

آسٹریلوی کھلاڑی بیو ویبسٹر نے اسٹیو اسمتھ کے لیے نیک خواہشات کا اظہار کرتے ہوئے کہا کہ انہیں سر پر سخت گیند لگی ہے اور امید ہے کہ وہ جلد صحت یاب ہو کر ٹیم میں واپس آئیں گے۔

واضح رہے کہ آسٹریلیا اور جنوبی افریقا کے درمیان سیریز کا دوسرا ٹیسٹ 18 اکتوبر سے گکیبرہا میں شروع ہونا ہے۔