خیبرپختونخوا بار کونسل کا گورنر راج اور ایمرجنسی کے خلاف آج یومِ سیاہ منانے کا اعلان

خیبرپختونخوا میں گورنر راج اور ایمرجنسی کے نفاذ کے خلاف بار کونسل نے آج یومِ سیاہ منانے کا اعلان کردیا ہے۔ بار کونسل کے مطابق احتجاج کے طور پر وکلا عدالتوں میں پیش نہیں ہوں گے۔

وکلا کی عدالتی کارروائیوں میں عدم شرکت کے باعث پشاور ہائیکورٹ اور ماتحت عدالتوں میں متعدد مقدمات کی سماعت ملتوی کردی گئی۔

خیبرپختونخوا بار کونسل نے آئین کے آرٹیکل 232 اور 234 کے نفاذ پر تشویش کا اظہار کرتے ہوئے وفاقی حکومت کے اقدام کو غیر جمہوری قرار دیا ہے۔ کونسل کا کہنا ہے کہ اس فیصلے کے خلاف وکلا احتجاج ریکارڈ کرائیں گے۔

واضح رہے کہ فراہم کردہ اطلاعات کے مطابق دو روز قبل وزیراعظم شہباز شریف کی ایڈوائس پر صدرِ مملکت آصف علی زرداری نے ایمرجنسی اور گورنر راج سے متعلق سمری پر دستخط کیے تھے۔