کھوکھلے مذاکرات سے مسائل حل نہیں ہوں گے،بیرسٹر گوہر کا بلاول بھٹو کو جواب

اسلام آباد: چیئرمین پاکستان تحریک انصاف بیرسٹر گوہر نے بلاول بھٹو زرداری کی جانب سے مذاکرات کی دعوت پر ردعمل دیتے ہوئے کہا ہے کہ محض دعووں اور بے نتیجہ مذاکرات سے مسائل حل نہیں ہوں گے۔ ان کا کہنا تھا کہ مذاکرات کے عمل کے نتیجے میں ان کی جماعت کی حکومت بھی ختم ہوگئی تھی۔

اسلام آباد ہائیکورٹ کے باہر میڈیا سے گفتگو کرتے ہوئے بیرسٹر گوہر نے کہا کہ پی ٹی آئی کی مذاکراتی کمیٹی حکومتی فریق کے ساتھ بات چیت میں شریک رہی، تاہم یہ سوال اپنی جگہ موجود ہے کہ مذاکرات ختم کرنے کا فیصلہ کس نے کیا۔

انہوں نے سوال اٹھایا کہ اگر مذاکرات کے دوران ڈیڈلاک پیدا ہوجائے تو کیا بات چیت کا سلسلہ ختم کردیا جاتا ہے؟ ان کا کہنا تھا کہ یہ بھی واضح ہونا چاہیے کہ مذاکرات کی میز سے فریقین کو الگ ہونے کے لیے کس نے کہا اور اس کی وجہ کیا تھی۔

خیبرپختونخوا میں ایمرجنسی اور گورنر راج کے معاملے پر چیئرمین پی ٹی آئی نے کہا کہ ان کی جماعت نے ہر فورم پر ان اقدامات کی مخالفت کی ہے۔ ان کے مطابق صوبے میں گورنر راج اور ایمرجنسی نافذ کرنے کے لیے حالات موزوں نہیں تھے اور یہ اقدامات غیر قانونی ہیں۔

بیرسٹر گوہر نے الزام عائد کیا کہ صوبے میں بیوروکریسی کی بڑے پیمانے پر تبدیلیوں کے بعد اب ایک سیاسی جماعت کو ختم کرنے کی کوشش کی جا رہی ہے۔ ان کا کہنا تھا کہ ایسے اقدامات جمہوری اصولوں کے منافی ہیں اور انہیں روکا جانا چاہیے۔

چیئرمین پی ٹی آئی نے مزید کہا کہ 11 اکتوبر کے بعد سے ان کی جماعت کا وزیراعلیٰ خیبرپختونخوا سہیل آفریدی سے رابطہ نہیں ہو سکا۔ ان کے مطابق پارٹی کے ارکانِ صوبائی اسمبلی اور اسپیکر صوبائی اسمبلی سے بھی رابطے میں مشکلات کا سامنا ہے۔