سانحۂ کارساز کے شہداء کی قربانیاں ہمیشہ یاد رکھی جائیں گی، بلاول بھٹو

کراچی: پاکستان پیپلز پارٹی کے چیئرمین بلاول بھٹو زرداری نے سانحۂ کارساز کے شہداء کو خراجِ عقیدت پیش کرتے ہوئے کہا ہے کہ 18 اکتوبر ملکی تاریخ کا ایک المناک دن ہے، جسے قوم ہمیشہ یاد رکھے گی۔

اپنے پیغام میں بلاول بھٹو زرداری نے کہا کہ شہید بینظیر بھٹو کی وطن واپسی پر انہیں نشانہ بنانے کی کوشش کی گئی، تاہم ان کے استقبال کے لیے آنے والے کارکنوں نے اپنی جانوں کی قربانیاں دے کر اپنی قائد سے وفاداری اور جمہوریت سے وابستگی کا ثبوت دیا۔

انہوں نے کہا کہ سانحۂ کارساز کے شہداء کی قربانیاں اس بات کی گواہ ہیں کہ دہشت گردی، انتہاپسندی اور تشدد جمہوری جدوجہد کے عزم کو متزلزل نہیں کر سکتے۔ ان کے مطابق یہ قربانیاں پاکستان کی تاریخ کا ایسا باب ہیں جسے آنے والی نسلیں بھی یاد رکھیں گی۔

پیپلز پارٹی کے چیئرمین نے کہا کہ شہید ذوالفقار علی بھٹو اور شہید بینظیر بھٹو کا مشن آئین کی بالادستی، عوام کی حکمرانی، مساوات اور سماجی انصاف کے فروغ کے ساتھ ایک پُرامن اور خوشحال پاکستان کی تعمیر تھا۔

بلاول بھٹو زرداری کا کہنا تھا کہ پاکستان پیپلز پارٹی جمہوری اداروں کے استحکام، آئین کے تحفظ اور عوام کے حقوق کے لیے اپنی جدوجہد جاری رکھے گی۔

انہوں نے سانحۂ کارساز کے شہداء کے درجات کی بلندی اور ان کے اہلِ خانہ کے لیے صبر کی دعا بھی کی۔ ان کا کہنا تھا کہ شہداء کی قربانیاں جمہوریت، ثابت قدمی اور عوامی حقوق کے تحفظ کے عزم کو ہمیشہ زندہ رکھیں گی۔