وزیراعلیٰ سندھ مراد علی شاہ کا شہدائے کارساز کو خراجِ عقیدت

وزیراعلیٰ سندھ سید مراد علی شاہ نے 18 اکتوبر کے شہدائے کارساز کو خراجِ عقیدت پیش کرتے ہوئے کہا ہے کہ ان کی قربانیوں نے ملک میں جمہوریت کے استحکام کے لیے اہم کردار ادا کیا۔

اپنے پیغام میں مراد علی شاہ نے کہا کہ 18 اکتوبر 2007 پاکستان کی تاریخ کا ایسا دن ہے جو جمہوریت کے لیے دی جانے والی قربانیوں کی یاد تازہ کرتا ہے۔ محترمہ بینظیر بھٹو شہید کے تاریخی استقبال کے لیے جمع ہونے والے نہتے کارکنوں پر حملہ ایک بزدلانہ اقدام تھا۔

وزیراعلیٰ سندھ کا کہنا تھا کہ سانحہ کارساز کے شہداء نے اپنی جانوں کا نذرانہ پیش کرکے بہادری اور وفاداری کی مثال قائم کی۔ دھماکوں کے باوجود کارکنوں نے محترمہ بینظیر بھٹو کی حفاظت کے لیے اپنی جانیں خطرے میں ڈال دیں۔

مراد علی شاہ نے کہا کہ شہداء کی قربانیاں ہمیشہ یاد رکھی جائیں گی اور پاکستان پیپلز پارٹی جمہوریت کے لیے ان کے مشن کو جاری رکھے ہوئے ہے۔ ان کے مطابق صدر آصف علی زرداری اور چیئرمین بلاول بھٹو زرداری بھی جمہوری جدوجہد کو آگے بڑھا رہے ہیں۔

انہوں نے کہا کہ سانحہ کارساز کا دکھ آج بھی عوام کے دلوں میں موجود ہے۔ وزیراعلیٰ سندھ نے شہداء کے درجات کی بلندی اور ان کے اہلِ خانہ کے لیے صبر و استقامت کی دعا بھی کی۔