وفاق کے ساتھ اب اختلافات نہیں ہوں گے،ساتھ چلیں گے اور ایک یونٹ ہوںگے،گورنر کے پی

پشاور: گورنر خیبرپختونخوا فیصل کریم کنڈی نے کہا ہے کہ وفاق کے ساتھ اب اختلافات نہیں ہوں گے، ساتھ چلیں گے اور ایک یونٹ ہوں گے۔ تمام صوبوں کے ساتھ بھی ایک پیج پر رہیں گے۔

فیصل کریم کنڈی کا کہنا تھا کہ انہوں نے پورے صوبے کو صاف ستھرا بنانے کا تہیہ کرلیا ہے۔ صفائی و ستھرائی اور تجاوزات کے خلاف آپریشن کا آغاز پشاور سے کیا گیا ہے اور اس معاملے میں کسی کی سفارش نہیں چلے گی۔

گورنر خیبرپختونخوا نے بتایا کہ گندم کے حوالے سے بھی انکوائری شروع کردی گئی ہے، جس کی رپورٹ جلد جاری کردی جائے گی۔

انہوں نے کہا کہ ٹریفک قوانین کے حوالے سے اجلاس طلب کیا گیا ہے، جس کا مقصد ٹریفک نظام کو بہتر بنانا ہے۔ اب صرف اچھے ترقیاتی منصوبے شروع کیے جائیں گے۔

فیصل کریم کنڈی نے مزید کہا کہ وفاق کے ساتھ مل کر چلیں گے اور تمام صوبوں کے ساتھ ہم آہنگی رکھیں گے۔ اب اختلافات کے بجائے سب ایک یونٹ کی حیثیت سے کام کریں گے۔