پاکستان ون ڈے رینکنگ میں چوتھے نمبر پر آگیا، آسٹریلیا کو پیچھے چھوڑ دیا

پاکستان کرکٹ ٹیم نے حالیہ کامیابیوں کے بعد آئی سی سی کی ون ڈے عالمی درجہ بندی میں ترقی حاصل کرتے ہوئے آسٹریلیا کو پانچویں پوزیشن پر دھکیل دیا ہے۔ قومی ٹیم اب 103 درجہ بندی پوائنٹس کے ساتھ چوتھے نمبر پر موجود ہے۔

رپورٹ کے مطابق سری لنکا اور انگلینڈ کے خلاف فتوحات کے بعد پاکستان کی درجہ بندی میں بہتری آئی ہے۔ تیسرے نمبر پر موجود جنوبی افریقا کے 104 پوائنٹس ہیں، یوں پاکستان اس سے صرف ایک پوائنٹ پیچھے ہے۔

عالمی درجہ بندی میں بھارت 115 پوائنٹس کے ساتھ پہلے جبکہ نیوزی لینڈ 109 پوائنٹس کے ساتھ دوسرے نمبر پر ہے۔ آسٹریلیا کی ٹیم تنزلی کے بعد پانچویں پوزیشن پر چلی گئی ہے۔

پاکستان کی حالیہ کامیابیوں میں انگلینڈ کے خلاف 87 رنز سے فتح اہم رہی۔ اس میچ میں نوجوان آل راؤنڈر عرفات منہاس نے شاندار کارکردگی دکھاتے ہوئے 58 گیندوں پر 59 رنز بنائے اور صرف 40 رنز دے کر 6 وکٹیں حاصل کیں۔

پاکستانی ٹیم نے ابتدائی مشکلات کے باوجود 81 رنز پر 4 وکٹیں گنوانے کے بعد حسن نواز کے 79 رنز، عرفات منہاس کی نصف سنچری اور فہیم اشرف کے جارحانہ 39 رنز کی بدولت مجموعی اسکور 302 رنز تک پہنچایا۔

ہدف کے تعاقب میں انگلینڈ کی ٹیم 215 رنز پر ڈھیر ہوگئی اور پاکستان نے 87 رنز سے کامیابی حاصل کی۔

پاکستان اب جنوبی افریقا سے صرف ایک پوائنٹ پیچھے ہے۔ قومی ٹیم کی فتوحات کا سلسلہ برقرار رہا تو عالمی درجہ بندی میں مزید بہتری کے امکانات پیدا ہوسکتے ہیں۔