ٹرمپ کی نیتن یاہو کی کھلی حمایت،اسرائیلی عوام سے ووٹ دینے کی اپیل

امریکی صدر ڈونلڈ ٹرمپ نے اسرائیل کے عوام سے اپیل کی ہے کہ وہ آئندہ انتخابات میں وزیراعظم بنجمن نیتن یاہو کے حق میں ووٹ دیں۔ ٹرمپ نے اسرائیلی وزیراعظم کی تعریف کرتے ہوئے انہیں ایک بہترین جنگجو وزیراعظم قرار دیا اور ایران کے خلاف امریکا اور اسرائیل کی مشترکہ فوجی کارروائیوں کو دونوں ممالک کے باہمی تعاون کی مثال کے طور پر پیش کیا۔

ڈونلڈ ٹرمپ نے اپنے سوشل میڈیا پلیٹ فارم ٹروتھ سوشل پر جاری پیغام میں اسرائیلی ووٹرز کو مخاطب کرتے ہوئے کہا کہ وہ ووٹ ڈالتے وقت نیتن یاہو کی قیادت اور کردار کو مدنظر رکھیں۔

امریکی صدر نے نیتن یاہو کو ان کے معروف عرفی نام ’’بی بی‘‘ سے مخاطب کیا اور انہیں غیر معمولی صلاحیتوں کا حامل جنگجو وزیراعظم قرار دیا۔ ٹرمپ نے ایران کے خلاف امریکا اور اسرائیل کی مشترکہ فوجی کارروائیوں کا حوالہ دیتے ہوئے دونوں ممالک کے درمیان تعاون کو بھی اجاگر کیا۔

ٹرمپ کا یہ بیان اسرائیل میں آئندہ انتخابات سے قبل سامنے آیا ہے، جسے نیتن یاہو کی سیاسی حمایت کے طور پر دیکھا جا رہا ہے۔ امریکی صدر کی جانب سے اسرائیلی ووٹرز سے براہِ راست اپیل ایسے وقت میں کی گئی ہے جب ملک میں انتخابی سرگرمیاں جاری ہیں۔

تاہم ٹرمپ کے بیان میں انتخابات کی تاریخ یا انتخابی عمل سے متعلق مزید تفصیلات نہیں دی گئیں۔