نئے صوبوں کا قیام پاکستان کے مستقبل سے جڑا معاملہ ہے، رانا ثنا اللہ

اسلام آباد: وزیراعظم کے مشیر اور مسلم لیگ (ن) کے سینئر رہنما رانا ثنا اللہ نے کہا ہے کہ نئے صوبوں کے قیام کا معاملہ انتہائی اہمیت کا حامل ہے اور اس کا تعلق پاکستان کے مستقبل سے ہے، اس لیے اس حوالے سے فیصلے پارلیمنٹ میں جامع بحث کے بعد کیے جانے چاہییں۔

ایک انٹرویو میں گفتگو کرتے ہوئے رانا ثنا اللہ نے کہا کہ نئے صوبوں کے معاملے پر تمام سیاسی جماعتوں کو اپنا مؤقف پیش کرنے کا موقع ملنا چاہیے اور پارلیمنٹ کے فورم پر تفصیلی مشاورت کے ذریعے آگے بڑھنا چاہیے۔

انہوں نے آئینی ترمیم کے حوالے سے کہا کہ اٹھارہویں آئینی ترمیم کے بعد ہونے والی کوئی بھی نئی ترمیم نمبر کے اعتبار سے اٹھائیسویں ترمیم ہوگی۔ ان کے مطابق یہ واضح ہونا ضروری ہے کہ مجوزہ ترمیم میں صوبوں کے قیام کا معاملہ شامل ہوگا یا دیگر قومی امور کو زیرِ بحث لایا جائے گا۔

رانا ثنا اللہ کا کہنا تھا کہ وفاق اور صوبوں کے درمیان مختلف معاملات پر بات چیت ہوتی رہتی ہے، تاہم نئے صوبوں جیسے اہم معاملے پر سیاسی لین دین کے بجائے عوامی خواہشات کو بنیادی اہمیت دی جانی چاہیے۔ انہوں نے کہا کہ اس معاملے میں عوامی رائے کو نظرانداز کرنا ملک کے ساتھ ناانصافی ہوگی۔

خیبر پختونخوا سے متعلق سوال پر وزیراعظم کے مشیر نے بتایا کہ وزیراعظم نے صوبے کی ترقی کے لیے بھرپور اقدامات کرنے اور دہشت گردی کے خلاف جنگ میں مسلح افواج کا ساتھ دینے کی ہدایت کی ہے۔