امریکا اور ایران کسی ابتدائی سفارتی مفاہمت کے انتہائی قریب پہنچ گئے، ٹام بیرک

واشنگٹن اور تہران کے درمیان کشیدگی کم کرنے کے لیے جاری سفارتی کوششیں بارآور ثابت ہونے لگی ہیں اور دونوں ممالک کسی ابتدائی سفارتی مفاہمت کے انتہائی قریب پہنچ چکے ہیں۔

ترکیہ میں متعین امریکی سفیر اور نمائندے ٹام بیرک نے بین الاقوامی نشریاتی ادارے سی این این سے گفتگو کرتے ہوئے دعویٰ کیا ہے کہ امریکا اور ایران فوجی کشیدگی میں کمی سے متعلق ایک معاہدے تک پہنچنے کے بہت قریب ہیں۔ ان کا کہنا تھا کہ آئندہ 2 ہفتوں کے دوران دونوں ممالک کی جانب سے کشیدگی کم کرنے اور فوجی جھڑپوں کو روکنے کے لیے اہم اقدامات کیے جانے کا امکان ہے۔

دستاویزات اور بیانات کے مطابق امریکی نمائندے نے خطے میں امن کے قیام کے لیے پاکستان اور قطر کی کوششوں کا کھل کر اعتراف کیا ہے۔ انہوں نے سراہتے ہوئے کہا کہ پاکستان، قطر اور دیگر اتحادی ممالک نے واشنگٹن اور تہران کے درمیان سیاسی عمل پر اتفاق رائے پیدا کرنے اور فریقین کو بات چیت کی میز پر لانے میں انتہائی اہم کردار ادا کیا ہے۔

ٹام بیرک نے دونوں فریقوں پر زور دیا ہے کہ وہ خطے میں کشیدگی میں مزید اضافے سے گریز کرتے ہوئے عارضی طور پر فوجی کارروائیاں روک دیں۔ ان کا کہنا تھا کہ اس وقت بنیادی مقصد فریقین کے درمیان کشیدگی کی شدت کو کم کرنا ہے تاکہ ماحول کو پرسکون بنایا جا سکے۔ انہوں نے واضح کیا کہ عارضی وقفے سے تنازع فوری طور پر ختم نہیں ہوگا، تاہم اس سے خطے کو وسیع تر سیاسی حل کی جانب پیش رفت کے لیے اپنا راستہ متعین کرنے کا بہترین موقع ضرور ملے گا۔