نوجوانوں کو مواقع فراہم کرنا اولین ترجیح ہے، محسن نقوی

وفاقی وزیر داخلہ محسن نقوی نے کہا ہے کہ اگر سیاست دان اپنے ذاتی تعلقات کو پس پشت ڈال کر صرف ملک کے لیے کام کرنا شروع کر دیں تو پاکستان کو کسی دوسری چیز کی ضرورت نہیں رہے گی۔ وہ امریکن سینٹر فار ایکسیلنس کے زیر اہتمام ہیلتھ ریکس کی افتتاحی تقریب سے خطاب کر رہے تھے۔ انہوں نے تقریب سے خطاب کرتے ہوئے اس بات پر زور دیا کہ جب اللہ تعالیٰ کسی کو منصب اور ذمہ داری عطا کرتا ہے تو اس کا حساب بھی لیتا ہے۔

محسن نقوی نے تقریب کے شرکاء کو بتایا کہ وہ خود بھی ماضی میں ایک امریکی کمپنی کے لیے خدمات انجام دے چکے ہیں، اس لیے وہ آئی ٹی اور اس سے منسلک شعبوں کی مشکلات سے بخوبی آگاہ ہیں اور رات کے اوقات میں جاگ کر کام کرنے کی صعوبتوں کو سمجھتے ہیں۔ انہوں نے کہا کہ حکومت نے انفارمیشن ٹیکنالوجی کے شعبے کو بھرپور معاونت فراہم کی ہے جس کے مثبت نتائج سامنے آئے ہیں اور اس شعبے کی برآمدات میں بھی نمایاں اضافہ ریکارڈ کیا گیا ہے۔

وزیر داخلہ کا مزید کہنا تھا کہ نوجوان نسل ہمارے ملک کا قیمتی اثاثہ ہے اور ان کے لیے روزگار کے بہتر مواقع پیدا کرنا حکومتی ترجیحات میں سرفہرست ہے۔ انہوں نے اس عزم کا اظہار کیا کہ ملک کو ترقی کی راہ پر گامزن رکھنے کے لیے نوجوانوں کو آگے بڑھنا ہوگا اور اپنا بھرپور کردار ادا کرنا ہوگا۔ انہوں نے امید ظاہر کی کہ دیگر پاکستانی کاروباری شخصیات بھی ملک میں اس نوعیت کے نئے کاروباری سیٹ اپ اور سرمایہ کاری کو فروغ دیں گی۔