امریکہ کا آئرن گیٹ منصوبہ محض الفاظ کا کھیل ہے، ایرانی پاسدارانِ انقلاب

ایرانی پاسدارانِ انقلاب نے امریکہ کے مجوزہ ’آئرن گیٹ‘ منصوبے کو محض الفاظ کا کھیل قرار دیتے ہوئے کہا ہے کہ ایران کا زمینی راستوں سے معاشی محاصرہ کرنے کی امریکی کوششیں ناکام ہوں گی۔

پاسدارانِ انقلاب کے ترجمان حسین محبی نے اپنے بیان میں کہا کہ امریکہ مختلف ناموں اور منصوبوں کے ذریعے ایران کا معاشی محاصرہ کرنے کی کوشش کر رہا ہے، تاہم اسے کامیابی نہیں ملے گی۔

حسین محبی کا کہنا تھا کہ ایران کے اپنے ہمسایہ ممالک کے ساتھ اچھے تعلقات ہیں اور ان روابط کو برقرار رکھنے کے لیے متعدد راستے موجود ہیں۔ ان کے بقول امریکہ اتنا طاقتور نہیں کہ ایران کے لیے یہ تمام راستے بند کر سکے۔

واضح رہے کہ کئی ماہ سے جاری امریکی بحری محاصرے کے بعد امریکی سینٹرل کمانڈ نے ہفتے کے روز ایک خصوصی ٹاسک فورس تشکیل دینے کا حکم دیا تھا، جس کا مقصد ایران کی زمینی سرحدوں اور بحیرہ کیسپیئن کے راستے جدید ہتھیاروں کے نظام اور دیگر پابندی زدہ اشیا کی نقل و حمل محدود کرنا ہے۔

آئرن گیٹ کے نام سے قائم کی جانے والی اس ٹاسک فورس میں تقریباً 20 فوجی اور سویلین اہلکار شامل ہوں گے۔ اس کا مرکز امریکی ریاست فلوریڈا کے شہر ٹمپا میں ہوگا، جبکہ یہ اپنے اقدامات کے لیے امریکی حکومت کے مختلف اداروں کے ساتھ رابطے اور ہم آہنگی بھی کرے گی۔

ایرانی ترجمان کے بیان سے ظاہر ہوتا ہے کہ تہران امریکی منصوبے کو اپنے علاقائی تجارتی روابط محدود کرنے کی ایک اور کوشش سمجھتا ہے۔