سندھ اور بلوچستان میں معدنی وسائل کی ترقی کیلئے ملکی و غیر ملکی سرمایہ کاری کی دعوت

سندھ حکومت نے معدنیات کی تلاش، پروسیسنگ اور برآمدی صنعتوں کو فروغ دینے کا فیصلہ کرتے ہوئے ملکی اور غیر ملکی سرمایہ کاروں کو سرمایہ کاری کی دعوت دے دی ہے۔ وزیراعلیٰ سندھ سید مراد علی شاہ کی زیر صدارت صوبے میں معدنی وسائل کی استعداد اور سرمایہ کاری سے متعلق ایک اہم اجلاس منعقد ہوا، جس میں وزیر معدنیات سید سردار علی شاہ، پرنسپل سیکریٹری آغا واصف، سیکریٹری توانائی شہاب انصاری، سیکریٹری معدنیات سہیل بلوچ اور اسپیشل سیکریٹری توانائی اسلم سومرو نے شرکت کی۔

اجلاس کے دوران وزیراعلیٰ سندھ نے کہا کہ معدنی وسائل کی تلاش، جدید کان کنی، پروسیسنگ اور ویلیو ایڈیشن میں سرمایہ کاری کی مکمل حوصلہ افزائی کی جائے گی۔ سرکاری دستاویزات اور بریفنگ کے مطابق سندھ کے معدنی وسائل میں تھر کا کوئلہ، گرینائٹ، خام لوہا، سنگ مرمر، چونا پتھر، سیلیسٹائٹ، چائنا کلے، سلیکا سینڈ اور جھیلوں کے نمک کے وسیع ذخائر شامل ہیں۔ تھر میں کوئلے کے ذخائر کا تخمینہ 175 ارب ٹن ہے جبکہ وہاں سے بجلی پیدا کرنے کی صلاحیت 3,300 میگاواٹ تک پہنچ چکی ہے۔ کوئلے سے بریکیٹس اور یوریا کی تیاری کے منصوبوں میں بھی سرمایہ کاری کے شاندار مواقع موجود ہیں۔

دوسری جانب، بلوچستان میں بھی غیر ملکی سرمایہ کاری کے حوالے سے اہم پیش رفت سامنے آئی ہے۔ سعودی پاکستان جوائنٹ بزنس کونسل کے چیئرمین شہزادہ منصور بن محمد آل سعود سے بلوچستان بورڈ آف انویسٹمنٹ اینڈ ٹریڈ کے وائس چیئرمین بلال خان کاکڑ کی قیادت میں آنے والے 10 رکنی وفد نے ملاقات کی۔ اس موقع پر سعودی کاروباری وفد کو بلوچستان میں سرمایہ کاری کے مواقع اور تیار منصوبوں پر تفصیلی بریفنگ دی گئی۔ سعودی وفد کے سربراہ نے بلوچستان کے تیار سرمایہ کاری منصوبوں میں عملی حصہ لینے اور تعاون کی یقین دہانی کرائی ہے۔

وزیراعلیٰ بلوچستان میر سرفراز بگٹی نے اس عزم کا اظہار کیا ہے کہ سعودی سرمایہ کاروں کے ساتھ تعاون کو عملی جامہ پہنانے کیلئے تمام ادارے متحرک ہیں۔ انہوں نے کہا کہ اس شراکت داری سے صوبے میں معاشی سرگرمیاں تیز ہوں گی اور روزگار کے نئے مواقع پیدا ہوں گے۔