خیبر پختونخوا میں پولیس آپریشن، انتہائی مطلوب دہشتگرد کمانڈر سیف اللہ ہلاک

خیبر پختونخوا کے علاقے باڑہ شیخان میں پولیس کی کامیاب کارروائی کے دوران فتنۃ الخوارج کا انتہائی مطلوب کمانڈر سیف اللہ مارا گیا، جب کہ صوابی اور ڈی آئی خان میں بھی دہشت گردی کے مختلف واقعات پیش آئے ہیں۔

پولیس حکام کے مطابق باڑہ شیخان میں ہونے والی اس کارروائی کے دوران مقابلے کے دوران 2 پولیس اہلکار معمولی زخمی ہوئے جنہیں فوری طور پر ابتدائی طبی امداد فراہم کر دی گئی۔ پولیس ریکارڈ کے مطابق ہلاک دہشت گرد کمانڈر سیف اللہ کالعدم تحریک طالبان پاکستان (ٹی ٹی پی) سے وابستہ تھا اور پولیس و محکمہ انسداد دہشت گردی (سی ٹی ڈی) کو متعدد سنگین مقدمات میں مطلوب اشتہاری تھا۔

سی ٹی ڈی ریکارڈ کے مطابق ہلاک دہشت گرد گرفتاری کے خوف سے گزشتہ 3 سال سے افغانستان میں مقیم تھا اور حال ہی میں دہشت گردوں کی ایک تشکیل کا کمانڈر مقرر ہو کر دہشت گردی کی غرض سے پاکستان واپس آیا تھا۔ دستاویز کے مطابق وہ میدانک کے علاقے میں سیکیورٹی چیک پوسٹوں پر متعدد براہ راست حملوں سمیت جمرود کے علاقے علی مسجد میں آئی ای ڈی دھماکوں میں بھی ملوث تھا۔ پولیس کے مطابق کارروائی کے دوران دہشت گرد کی جانب سے گرینیڈ حملہ بھی کیا گیا، جس کے نتیجے میں 2 پولیس اہلکاروں کو معمولی خراشیں آئیں۔

انسپکٹر جنرل آف پولیس خیبرپختونخوا ذوالفقار حمید نے انتہائی مطلوب دہشت گرد کمانڈر کو ہلاک کرنے پر خیبرپختونخوا پولیس کے جوانوں کی تعریف کرتے ہوئے انہیں شاباش دی ہے۔ انہوں نے اپنے بیان میں کہا کہ بہترین کارروائی کے دوران خارجی کمانڈر کو ہلاک کرکے سیکڑوں معصوم جانوں کو بچانے والے پولیس اہلکار قوم کا اصل اثاثہ ہیں۔ آئی جی پولیس نے عزم ظاہر کیا کہ پاک سرزمین کو آخری دہشت گرد سے پاک کرنے تک آپریشنز اور کارروائیوں کا سلسلہ بلا تعطل جاری رہے گا۔

دوسری جانب صوبے کے دیگر اضلاع میں بھی بدامنی کے واقعات رونما ہوئے ہیں۔ ڈسٹرکٹ پولیس آفیسرز (ڈی پی او) صوابی وقاص رفیق کے مطابق گزشتہ رات پولیس چوکی منصوری کی حدود میں نامعلوم شرپسندوں کی فائرنگ سے چوکی انچارج ولید خان سمیت 2 اہلکار شہید جبکہ 1 اہلکار زخمی ہوگیا۔ پولیس نے لاشوں اور زخمی اہلکار کو فوری طور پر باچا خان میڈیکل کمپلیکس منتقل کرتے ہوئے علاقے کو گھیرے میں لے کر سرچ آپریشن شروع کر دیا ہے۔ دریں اثنا، ڈیرہ اسماعیل خان میں دہشت گردوں نے بارود سے بھری گاڑی تھانہ بندکوائی کے مین گیٹ سے ٹکرا دی، جس کے نتیجے میں تھانے کا مین گیٹ اور دیوار مکمل طور پر تباہ ہو گئی تاہم خوش قسمتی سے کوئی جانی نقصان نہیں ہوا۔ پولیس کے بروقت پہنچنے پر حملہ آور دہشت گرد پسپا ہو کر فرار ہونے میں کامیاب ہو گئے۔