متحدہ عرب امارات میں 23 گاڑیاں خوفناک حادثے کا شکار،14 افراد جاں بحق، 30 زخمی

فجیرہ: متحدہ عرب امارات کی ریاست فجیرہ میں خوفناک ٹریفک حادثے کے نتیجے میں کم از کم 14 افراد جاں بحق جبکہ 30 زخمی ہوگئے۔ حادثے میں مجموعی طور پر 23 گاڑیاں شامل تھیں، جن میں 18 دیگر گاڑیاں اور پانچ ٹرک شامل ہیں۔

متحدہ عرب امارات کی وزارت داخلہ نے جمعرات 12 نومبر کو حادثے میں ہلاکتوں اور زخمیوں کی تازہ ترین تعداد جاری کرتے ہوئے بتایا کہ اعداد و شمار ابتدائی ہیں، جبکہ امدادی کارروائیاں اور حادثے کی وجوہات جاننے کے لیے تحقیقات جاری ہیں۔

اماراتی اخبار گلف نیوز اور عالمی خبر رساں ادارے رائٹرز کے مطابق فجیرہ پولیس نے ابتدائی طور پر حادثے میں متعدد افراد کے جاں بحق اور زخمی ہونے کی اطلاع دی تھی، تاہم اس وقت حتمی تعداد جاری نہیں کی گئی تھی۔

حادثہ کیسے پیش آیا؟

فجیرہ پولیس کے ابتدائی بیان کے مطابق حادثہ جمعرات کی درمیانی شب 12 بجے کے بعد شیخ خلیفہ بن زاید روڈ پر امارت فجیرہ کے داخلی راستے کے قریب پیش آیا، جہاں ایک ٹرک کئی گاڑیوں سے ٹکرا گیا۔

اطلاع ملتے ہی پولیس، ایمبولینس اور سول ڈیفنس کی ٹیمیں جائے حادثہ پر پہنچ گئیں۔ امدادی کارکنوں نے زخمیوں کو ابتدائی طبی امداد فراہم کی اور ضروری علاج کے لیے اسپتالوں میں منتقل کیا۔

پولیس نے جائے حادثہ کو محفوظ بنانے اور ٹریفک کی روانی برقرار رکھنے کے لیے بھی اقدامات کیے۔ حکام نے تاحال ابتدائی تصادم کی وجہ، گاڑیوں کے آپس میں ٹکرانے کی ترتیب اور کسی مخصوص ڈرائیور کی ممکنہ غلطی سے متعلق تفصیلات جاری نہیں کیں۔

وزارت داخلہ کی ہلاکتوں اور زخمیوں کی تصدیق

وزارت داخلہ کے تازہ بیان کے مطابق حادثے میں 14 افراد جاں بحق اور 30 زخمی ہوئے ہیں۔ ہنگامی اور خصوصی امدادی ٹیمیں جائے حادثہ پر صورتحال سے نمٹنے میں مصروف ہیں، جبکہ زخمیوں کو طبی امداد فراہم کی جا رہی ہے۔

متعلقہ ادارے امدادی کارروائیوں میں باہمی رابطے کے ساتھ کام کر رہے ہیں اور حادثے کے تمام حالات و واقعات کا جائزہ لے رہے ہیں۔

حکام نے جاں بحق افراد کے اہلخانہ سے تعزیت اور زخمیوں کی جلد صحت یابی کے لیے نیک تمناؤں کا اظہار کیا ہے۔ وزارت داخلہ نے تاحال جاں بحق اور زخمی ہونے والے تمام افراد کے نام اور قومیتوں کی مکمل فہرست جاری نہیں کی۔

پولیس کے مطابق حادثے کی وجوہات اور حالات کا تعین کرنے کے لیے تحقیقات شروع کردی گئی ہیں اور تصدیق شدہ معلومات دستیاب ہونے پر مزید تفصیلات جاری کی جائیں گی۔

حکام نے ڈرائیوروں کو ٹریفک قوانین کی پابندی، مقررہ رفتار برقرار رکھنے اور گاڑیوں کے درمیان محفوظ فاصلہ رکھنے کی بھی ہدایت کی ہے۔

حادثے کی اصل وجہ سے متعلق تاحال کوئی حتمی سرکاری نتیجہ سامنے نہیں آیا۔