انصاف اور برابری کی بات کرنے والوں کے اپنے ہاتھ بھی صاف ہونے چاہییں۔خواجہ آصف

اگر نظام کی ناکامی کی بات کی جا رہی ہے تو اس سے وابستہ تمام افراد کو اپنی ذمہ داریوں کا بھی جائزہ لینا چاہیے۔

November 18, 2026 · اہم خبریں, قومی
انصاف اور برابری کی بات کرنے والوں کے اپنے ہاتھ بھی صاف ہونے چاہییں۔خواجہ آصف

انصاف اور برابری کی بات کرنے والوں کے اپنے ہاتھ بھی صاف ہونے چاہییں۔خواجہ آصف

وزیر دفاع خواجہ آصف نے چیئرمین پیپلز پارٹی بلاول بھٹو زرداری کی تنقید کا جواب دیتے ہوئے کہا ہے کہ جو شخص انصاف اور برابری کی بات کرتا ہے، اس کے اپنے ہاتھ بھی صاف ہونے چاہییں۔

خواجہ آصف نے سماجی رابطے کی ویب سائٹ ایکس پر اپنے بیان میں یہ جملہ ایسے وقت کہا ہے جب حکمران اتحاد میں شامل مسلم لیگ (ن) اور پیپلز پارٹی کے درمیان نئے صوبوں سمیت مختلف معاملات پر اختلافات نمایاں ہو رہے ہیں۔

بلاول بھٹو زرداری نے ایک روز قبل اپنی تقریر میں نئے صوبوں کے قیام، حکومتی نظام اور اپوزیشن کے مطالبات پر بات کرتے ہوئے کہا تھا کہ پاکستان کی تاریخ میں ریفرنڈم ہمیشہ غیر جمہوری اقدامات کے لیے کرائے گئے، جمہوری فیصلوں کے لیے نہیں۔

انہوں نے حکومتی نظام سے متعلق کہا تھا کہ نظام خود بخود نہیں گرا بلکہ اسے گرایا گیا ہے۔ یہ بیان وزیر داخلہ محسن نقوی کے اس مؤقف کے تناظر میں سامنے آیا تھا کہ موجودہ نظام حکمرانی ناکام ہو چکا ہے اور اسے تبدیل کرنے کی ضرورت ہے۔

خواجہ آصف نے اپنے جواب میں کہا کہ عوامی حمایت کے بغیر کوئی نظام تبدیل نہیں ہو سکتا۔ اگر نظام کی ناکامی کی بات کی جا رہی ہے تو اس سے وابستہ تمام افراد کو اپنی ذمہ داریوں کا بھی جائزہ لینا چاہیے۔

وزیر دفاع نے نئے صوبوں کے معاملے پر ریفرنڈم کی تجویز کی بھی حمایت کی اور کہا کہ پارلیمنٹ میں نظام کی تبدیلی پر بحث ضرور ہوگی، لیکن عوام کو بھی اپنی بنیادی رائے دینے کے حق سے محروم نہیں کیا جا سکتا۔ ان کے مطابق پارلیمنٹ کے ساتھ عوامی رائے کو بھی اہمیت دی جائے تو فیصلے کو زیادہ جواز حاصل ہوگا۔

بلاول بھٹو کی جانب سے سابق وزیراعظم عمران خان کی رہائی اور اپوزیشن کے دیگر مطالبات کی حمایت پر بھی خواجہ آصف نے ردعمل دیتے ہوئے کہا کہ پاکستان میں سیاست دانوں کا احتساب کوئی نئی بات نہیں اور کوئی بھی سیاست دان احتساب سے بالاتر نہیں ہے۔

نئے صوبوں کے معاملے پر پیپلز پارٹی اور مسلم لیگ (ن) کے رہنماؤں کے درمیان اختلافات اس وقت مزید نمایاں ہوئے ہیں جب بلاول بھٹو نے سندھ کی تقسیم کی مخالفت کرتے ہوئے خبردار کیا کہ زبردستی صوبہ بنانے کی کوشش کے سنگین نتائج ہو سکتے ہیں۔ دوسری جانب حکومتی حلقوں کی جانب سے ریفرنڈم کے ذریعے عوامی رائے لینے کی تجویز بھی سامنے آ چکی ہے۔