عالم اسلام القدس کے امتحان میں نا کام ہو چکا ہے۔ طیب رجب اردوان

انقرہ:ترک صدر ترک صدر طیب رجب اردوان نے کہا ہے کہ عالم اسلام القدس کے امتحان میں نا کام ہو چکا ہے اور صرف عالم اسلام ہی نہیں بلکہ ساری انسانیت ہی اس معاملے میں ناکام ہوچکی ہے ۔ استنبول میں احتجاجی ریلی سے خطاب کرتے ہوئے انہوں نے کہا کہ اسرائیل نہتے فلسطینیوں پر آتش و آہن کی بارش کر رہا لیکن ساری دنیا خاموش تماشائی بنی ہوئی ہے۔ انہوں نے کہا کہ وہ تمام طاقتیں اس جرم میں پوری طرح شامل ہیں جو اس وقت اسرائیلی جارحیت پر خاموشی اختیار کئے ہوئے ہیں ، ترک صدر فلسطینیوں کے ساتھ اظہار یکجہتی کے لئے نکالی گئی احتجاجی ریلی سے خطاب کر رہے تھے ۔ اس ریلی میں 5لاکھ سے زائد ترک مظاہرین نے شرکت کی جنہوں نے ہاتھوں میں فلسطینیوں کے ساتھ اظہار یکجہتی کیلئے کتبے اور بینرز اٹھا رکھے تھے اور وہ اسرائیل کے خلاف فلک شگاف نعرے لگا رہے تھے ۔