سونے کی فی تولہ قیمتوں‌میں مزید کمی

کراچی: عالمی مارکیٹ میں سونے کی فی اونس قیمتوں میں اضافہ ہوا مگر مقامی صرافہ بازاروں میں فی تولہ کی قیمت مزید کم ہوگئی۔
انتخابات کے بعد بین الاقوامی بلین مارکیٹ میں اگرچہ صرف 4 ڈالر کی کمی ہوئی لیکن مقامی صرافہ مارکیٹوں میں اسکے برعکس فی تولہ سونے کی قیمت ان 3دنوں میں 2850 روپے او فی 10گرام سونے کی قیمتوں میں 2443 روپے یا 4.81 فیصد کی نمایاں کمی ریکارڈ کی گئی۔
ماہرین کا کہنا ہے کہ امریکی ڈالر کے مقابل روپے کی قدر میں ریکوری کے نتیجے میں سونے کی مقامی قیمتوں میں کمی آئی۔
گزشتہ روز بین الاقوامی بلین مارکیٹ میں فی اونس سونے کی قیمت 4 ڈالر کے اضافے سے1224 ڈالر کی سطح پر پہنچنے کے باوجود مقامی صرافہ مارکیٹوں میں پرائس ایڈجسٹمنٹ کے باعث فی تولہ اور فی دس گرام سونے کی قیمتوں میں بالترتیب 1650 روپے اور1414روپے نمایاں کمی واقع ہوئی جس کے نتیجے میں کراچی حیدرآباد سکھر ملتان فیصل آباد لاہور اسلام آباد راولپنڈی پشاور اور کوئٹہ کی صرافہ مارکیٹوں میں فی تولہ سونے کی قیمت گھٹ کر56 ہزار350 روپے اور فی دس گرام سونے کی قیمت گھٹ کر48 ہزار 311روپے ہوگئی تاہم اسی طرح فی تولہ چاندی کی قیمت 5 روپے کی کمی سے 760 اور فی دس گرام چاندی کی قیمت4 روپے29 پیسے گھٹ کر651 روپے 57 ہوگئی۔