لارڈز ٹیسٹ کے دوسرے روزبھارتی ٹیم 107 رنز پر ڈھیر

لندن : انگلینڈ اور بھارت کے درمیان کھیلے جا نے والے دوسرے ٹیسٹ کے دوسرے روز جیمز اینڈرسن کی تباہ کن بولنگ کے باعث بھارتی ٹیم پہلی اننگز میں 107 رنز پر آؤٹ ہو گئی۔

لارڈز کے تاریخی گراؤنڈ میں کھیلے جانے والے میچ میں انگلش ٹیم کے کپتان جوئے روٹ نے ٹاس جیت کر پہلے فیلڈنگ کا فیصلہ کیا تاہم پہلے روز بارش اور خراب موسم کے باعث کھیل نہ ہو سکا۔دوسرے روز بھی خراب موسم کے باعث کھیل تاخیر سے شروع ہوا لیکن آغاز سے ہی بھارتی بلے باز انگلش بولرز کی سوئنگ ہوتی گیندوں کے سامنے بے بس نظر آئے۔

انگلینڈ کی جانب سے جیمز اینڈرسن نے شاندار بولنگ کا مظاہرہ کرتے ہوئے صرف 20 رنز کے عوض 5 کھلاڑیوں کو آؤٹ کیا۔کرس ووکس نے 2 شکار کئے جبکہ سٹورٹ براڈ اور سیم کیرن نے ایک ایک وکٹ حاصل کی اور اس طرح پوری بھارتی ٹیم 2.36 اوورز میں 107 رنز بنا کر ڈھیر ہو گئی جبکہ6 بھارتی کھلاڑی دوہرا ہندسہ بھی عبور نہ کر سکے۔

بھارت کی جانب سے روی چندرن ایشون نے سب سے زیادہ 29 رنز بنائے جبکہ ویرات کوہلی 23 اور اجنکیا ریحانے 18 رنز بنا سکے۔ خیال رہے کہ 5 ٹیسٹ میچوں کی سیریز کے پہلے میچ میں انگلینڈ نے دلچسپ مقابلے کے بعد بھارت کو شکست دی تھی۔