یمن میں سعودی فوج کا ہیلی کاپٹر گر کر تباہ

ریاض:یمن کے المہرہ شہر میں سعودی عرب کا فوجی ہیلی کاپٹر گر کر تباہ ہوگیا ،حادثے میں پائلٹ اور معاون شہید ہوگئے،سعودی سیکورٹی اداروں نے ہیلی کاپٹر کی تباہی کے حوالے سے تحقیقات شروع کر دیں،دوسری طرف سعودی فضائی ڈیفنس فورس نے حوثی باغیوں کی طرف سے داغا گیا بیلسٹک میزائل سرحدی شہر نجران میں مار گرایا، اس واقعے میں کوئی جانی نقصان نہیں ہوا۔

عرب میڈیا کے مطابق یمن میں آئینی حکومت کی عمل داری کے قیام کے لیے سرگرم عرب عسکری اتحادی افواج کے ترجمان کرنل ترکی المالکی نے تصدیق کی ہے کہ عسکری اتحاد کا ایک فوجی ہیلی کاپٹر یمن کے المہرہ شہر میں گر کر تباہ ہوگیا جس کے نتیجے میں ہیلی کاپٹر کا پائلٹ اور اس کا معاون شہید ہوگئے،تباہ ہونے والا ہیلی کاپٹر سعودی بری افواج کا تھا جو فنی خرابی کے باعث گرکر تباہ ہوا۔