محمود آباد میں مسجد کے تنازع پر فائرنگ سے ایک ہلاک 3زخمی

کراچی کے علاقے محمود آباد 5 میں سلطان مسجد کے تنازع پر ہونے والی فائرنگ سے ایک شخص ہلاک اور تین افراد زخمی ہوگئے۔

پولیس کا کہنا ہے کہ مسجد پر دیوبندیوں اور بریلویوں کا ڈیڑھ سال سے جھگڑا تھاجس کا عدالت نے دیوبندیوں کے حق میں فیصلہ دیدیا ہوا تھا ، دیوبندی افراد عدالت کے فیصلے کے بعد مسجد میں آکربیٹھ گئے تھے کہ بریلویوں نے سنی تحریک کے ساتھ مل کر حملہ اور فائرنگ کردی جس سے ایک شخص ہلاک اور3زخمی ہوئے۔

اطلاع ملتے ہی پولیس کی بھاری نفری نے موقع پر پہنچ کر زخمیوں کو فوری طور پر قریبی اسپتال پہنچاتے ہوئے 10 افراد کو حراست میں لے لیا۔

ایس ایچ او نے امت کو بتایا کہ اسپتال میں دوران علاج ایک شخص نے دم توڑ دیا جس کی شناخت 35 سالہ کاشف ولد غلام حسین کے نام سے ہوئی ، زخمیوں کی شناخت45 سالہ حفیظ قریشی ولد راجہ حنیف ، 30 سالہ یامین ولد اسماعیل اور 30 سالہ عدیل ولد اسماعیل کے نام سے ہوئی ہے۔آئی جی سندھ نے واقعہ کا نوٹس لیتے ہوئے ایس ایس پی سے رپورٹ طلب کرلی ۔