کراچی، دائود چورنگی میں بینک سے رقم نکالنے والے شہری کو لوٹ لیاگیا

کراچی کے علاقے دائود چورنگی ہڈی مل پر واقع نجی بینک سے 57ہزار روپے لے کر نکلنے والے شہری کو قائدآباد کے علاقے شیر پاو کالونی میں گھر کے باہر اسلحہ کے زور پر نامعلوم ملزمان لوٹ کر فرار ہوگئے ۔
تفصیلات کے مطابق قائد آباد کے علاقے داود چورنگی ہڈی مل کے پاس قائم نجی بینک سے 57 ہزار روپے لے کر نکلنے والے شہری کو نامعلوم موٹر سائیکل سواروں 4 ملزمان نے اسلحہ کے زور پر لوٹ لیا ۔
امت کو لوٹنے والے شہری محبت خان نے بتایا کہ منگل کے روز 12 بجے کے قریب نجی بینک سے رقم نکال کر واپس شیر پاو کالونی میں واقع اپنے گھر کے پاس پہنچا ہی تھا کہ دو موٹر سائیکلوں پر سوار 4 ملزمان نے اسلحہ کے زور پر 57 ہزارروپے نقدی اور موبائل فون لوٹ کر فرار ہو گئے ۔
شہری نے بتایا کہ واقعے کی اطلاع تھانے میں درج کر لی ہے ،ایس ایچ او قائد آباد معراج انور نے امت کو بتایا کہ پولیس بینک میں لگے کیمروں کی سی سی ٹی وی فوٹیج حاصل کر رہی ہے ، کیمروں کے مدد سے ملزمان کو جلد گرفتار کر لیا جائے گا۔