معیشت تباہ کرنے میں نیب کا بہت بڑا حصہ ہے۔شاہد خاقان عباسی

مسلم لیگ ن کے سینئر نائب صدر شاہد خاقان عباسی نے کہا ہے کہ چیئرمین نیب ملک کے ٹھیکیدار نہ بنیں، انہیں سیاستدانوں کی بے عزتی کا کوئی حق نہیں، نیب جانبدار ادارہ نہیں رہا، معیشت تباہ کرنے میں ادارے کا بہت بڑا حصہ ہے۔

پاکستان مسلم لیگ نون کے رہنما شاہد خاقان عباسی نے پریس کانفرنس سے خطاب کرتے ہوئے کہا شہباز شریف کی کبھی چیئرمین نیب سے ملاقات نہیں ہوئی، چیئرمین نیب نے انٹرویو میں بتایا انہیں رشوت دینے کی کوشش کی گئی، انہوں نے جو باتیں کیں وہ کبھی نہیں ہوئیں، چیئرمین نیب کے انٹرویو کا مقصد وقت کیساتھ سامنے آ جائے گا۔

شاہد خاقان عباسی کا کہنا تھا سیاستدانوں کو بدنام کرنا روایت بن گئی ہے، 3500 کیسز چل رہے ہیں، کسی کا فیصلہ نہیں ہو رہا، علیم خان کی ضمانت ہو جاتی ہے، فواد حسن، احد چیمہ کی نہیں، فواد حسن فواد پر سفارش کرانے پر مقدمہ ہے، جھوٹ جو بھی بول رہا ہے بدنام سیاستدان ہو رہے ہیں، سیاستدانوں کی پگڑیاں اچھالی جا رہی ہیں۔

پاکستان مسلم لیگ ن کے رہنما نے کہا نیب نے بیورو کریسی کو مفلوج کر دیا ہے، کہا گیا احد چیمہ تکبر کا شکار ہوئے، نواز شریف اور شہباز شریف پر ڈیل آفر کرنے کا الزام لگا، کردار کشی کا سلسلہ ختم نہیں ہوا، کہا گیا نیب کا کوئی ریکارڈ ضائع نہیں ہوا،غیرجانبدارادارہ ہے، افسوس کیساتھ کہہ رہا ہوں نیب غیر جانبدار نہیں۔

شاہد خاقان عباسی نے مزید کہا کہ چیئرمین نیب کے عہدے کا حکومت اوراپوزیشن مل کر چناؤ کرتی ہے، ہم سے زیادہ کوئی احتساب کے حق میں نہیں، احتساب سب کا ہونا چاہیئے،ہم حاضر ہیں، ہمارا احتساب آپ نے کرلیا۔