سائنسدان پر جھوٹا مقدمہ۔بھارتی حکومت پر5 لاکھ جرمانہ

بھارتی سپریم کورٹ نے خلائی سائنس دان نمبی نارایانن کو جاسوسی کے جھوٹے مقدمات میں پھنسانے پر کیرالہ حکومت پر5 لاکھ روپے ہرجانہ عائد کردیا۔

بھارتی میڈیا کے مطابق دشمن ملک کے لیے جاسوسی کرنے کے الزام میں انڈین اسپیس ریسرچ آرگنائزیشن (ISRO) کے سائنس دان نمبی نارایانن کو 24 سال بعد انصاف مل گیا۔

بھارتی سپریم کورٹ نے کیرالہ حکومت کو خلائی سائنس دان کو 5 لاکھ ہرجانہ ادا کرنے کا حکم بھی دیا۔ بھارت کے انسانی حقوق کا قومی ادارہ پہلے ہی نمبی نارایانن کو 10 لاکھ روپے دینے کا اعلان کرچکا ہے۔

چیف جسٹس دیپک مشرا کی سربراہی میں 3 رکنی بینچ نے اپنے فیصلے میں مزید لکھا کہ ہرجانے کی رقم اُن پولیس افسران سے لی جائے جنہوں نے سائنس دان نمبی نارایانن کو جاسوسی جیسے سنگین اور حساس معاملے میں جھوٹے مقدمے میں پھنسایا۔ علاوہ ازیں سپریم کورٹ نے ریٹائرڈ جج کی سربراہی میں ایک کمیٹی بھی تشکیل دی جو جھوٹے مقدمات بنانے اورغلط تحقیقات کرنے والوں کا تعین کرکے سزا کی سفارش کرے گی۔

بھارتی خلائی تحقیقی ادارے کے سائنس دان نمبی نارایانن کو 24 سال قبل دشمن ملک کے لیے جاسوسی کرنے کے الزام میں کیرالہ پولیس نے 1994 میں حراست میں لیا تھا، زیر حراست سائنس دان کی دنیا بھر میں بدنامی ہوئی اور اہل خانہ کی زندگیوں کو شدید خطرات لاحق ہوگئے تھے۔ تاہم پولیس کسی قسم کے شواہد پیش کرنے سے قاصر رہی تھی۔

بعد ازاں سائنس دان نمبی نارایانن نے مقدمہ جھوٹا ثابت ہونے پر پولیس اور تحقیقاتی ایجنسی کے اہل کاروں کے خلاف ہتک عزت اور ساکھ خراب کرنے کا مقدمہ دائر کیا تھا جسے ہائی کورٹ نے تو مسترد کردیا تھا لیکن سپریم کورٹ نے 3 رکنی پینل بناکر سماعت شروع کی تھی۔