کراچی میں کورونا کے باعث مزید 73 اموات

صوبائی دارالحکومت کراچی میں کورونا وائرس کے باعث مزید 73 اموات رپورٹ ہوئی ہیں جس کے بعد شہر میں وبا سے جاں بحق ہونے والوں کی تعداد 1125 ہو گئی۔

محکمہ صحت سندھ کے مطابق کورونا وائرس سے ضلع شرقی میں ایک روز میں سب سے زیادہ 36 اموات رپورٹ ہوئیں جبکہ ضلع وسطی میں 16، کورنگی میں 5 اور ملیرمیں 4 اموات ہوئی ہیں۔

بتایا گیا ہے کہ عالمی وبا سے ضلع جنوبی اور ضلع غربی میں 6،6 اموات رپورٹ ہوئی ہیں۔

خیال رہے کہ پاکستان میں گزشتہ 24 گھنٹوں کے دوران کورونا کے سبب مزید 49 اموات رپورٹ ہوئیں جس کے بعد اموات کی مجموعی تعداد 4 ہزار 167 ہو گئی ہے۔

ملک بھر سے کورونا وائرس کے مزید 3 ہزار557 کیسز رپورٹ ہوئے جس کے بعد متاثرہ افراد کی تعداد 2 لاکھ 6 ہزار512 ہو گئی۔

نیشنل کمانڈ اینڈ آپریشن سینٹر کی جانب سے جاری کیے گئے اعدادوشمار کے مطابق ملک بھر میں کورونا سے متاثرہ 95 ہزار 407 مریض صحت یاب ہو گئے۔