ساؤتھمپٹن ٹیسٹ دلچسپ مرحلے میں داخل،ویسٹ انڈیزکی پیش قدمی جاری

ساؤتھمپٹن ٹیسٹ دلچسپ مرحلے میں داخل ہوگیا۔ ویسٹ انڈیزنے دوسری اننگز میں 4وکٹوں کے نقصان پر150رنز بنا لیے،اس وقت بلیک ووڈ70رنزبناکرکریزپرموجود ہیں جبکہ ان کا ساتھ شین ڈائورچ دے رہے ہیں۔

ویسٹ انڈیزکو ٹیسٹ میچ جیتنے کیلیے 50رنزاورانگلینڈ کو6 وکٹیں درکار ہیں آج میچ کا آخری روز ہے اس سے پہلے ویسٹ انڈیزکی تین وکٹیں صرف27رنزپرگرگئی تھیں تاہم روسٹن چیزاوربلیک ووڈ نے73قیمتی رنز جوڑکر ٹیم کو سہارا دیا۔

اس سے قبل انگلینڈ نے ویسٹ انڈیزکو جیت کے لیے 200 رنزکا ہدف دیا تھا۔پہلے ٹیسٹ کی دوسری اننگز میں میزبان ٹیم انگلینڈ 318 رنز بنا کرآؤٹ ہو گئی۔ انگلینڈ کی جانب سے کراولی 76، اور سیبلی 50 رنز بنا کر نمایاں رہے۔

ویسٹ انڈیز کی جانب سے شینن گیبریل نے پانچ، روسٹن چیز  اور الزاری جوزف نے دو دو وکٹیں حاصل کیں۔

انگلش ٹیم نے ٹیسٹ کے چوتھے روز اپنی دوسری اننگز 15 رنز بنا کسی نقصان سے آگے بڑھائی تو اوپنرز نے زبردست آغاز فراہم کرتے ہوئے 72 رنز کی شراکت داری قائم کی۔

میزبان ٹیم نے 3 وکٹوں کے نقصان پر 249 رنز بنالئے تھے تاہم اختتامی اوورز میں ویسٹ انڈین بولرز نے شاندار کم بیک کیا اور 279 رنز تک 8 بلے بازوں کو پویلین پہنچا دیا۔

انگلش ٹیم کی پہلی اننگز کے 204 رنز کے جواب میں ویسٹ انڈین ٹیم 318 رنز بناکر آؤٹ ہوئی تھی اور اسے  114 رنز کی برتری حاصل تھی۔

ٹاس جیت کر پہلے بیٹنگ کرتے ہوئے انگلش ٹیم 204 کے مجموعے پر پویلین لوٹ گئی تھی۔ انگلینڈ کی جانب سے کپتان اسٹوکس نے 43، بٹلر نے 35، بیس نے ناٹ آؤٹ 31 اور برنس نے 30 رنز بنائے تھے جبکہ ویسٹ انڈین کپتان ہولڈر نے 42 رنز کے عوض 6 اور گیبریئل نے 62 رنز کے عوض 4 کھلاڑیوں کو پویلین کی راہ دکھائی تھی۔

جواب میں ویسٹ انڈین ٹیم نے بیٹنگ میں بھی اچھی کارکردگی کا مظاہرہ کیا اور 318 رنز بناکر 114 رنز کی برتری حاصل کی تھی۔

مہمان ٹیم کی جانب سے اوپنر بریتھویٹ نے 65، ڈوریچ نے 61 اور روسٹن چیز نے 47 رنز بنائے۔ انگلینڈ کے کپتان اسٹوکس نے 4، اینڈرسن نے 3، بیس نے 2 اور ووڈ نے ایک وکٹ حاصل کی تھی جبکہ جوفرا آرچر کوئی وکٹ حاصل نہ کرسکے تھے۔