قوم مستقبل کے چیلنج سے نمٹنے کیلیے تیارہوجائے۔پروفیسرمحمد اقبال

بین الاقوامی مرکز برائے کیمیائی و حیاتیاتی علوم (آئی سی سی بی ایس) جامعہ کراچی کے سربراہ پروفیسر ڈاکٹر محمد اقبال چوہدری نے کہا ہے کہ عالمی وبا (کویڈ19)کے بعد معاشی بحالی کے تناظر میں پاکستانی قوم کو مستقبل کے چیلنج سے نمٹنے کے لیے تیار ہونے کی ضرورت ہے۔

یہ بات پروفیسراقبال چوہدری نے آئی سی سی بی ایس جامعہ کراچی کے تحت جمعہ کو سلیم الزماں صدیقی آڈیٹوریم میں ایم فل اورپی ایچ ڈی پروگرام برائے2020کے نئے طالب علموں کے لیے منعقدہ ایک تعارفی کلاس میں کہی۔

پروفیسراقبال چوہدری نے نئے محقیقین کو خوش آمدید کہتے ہوئے کہا کہ یہ آپ کی خوش قسمیتی ہے کہ آپ ایک بین الاقوامی ادارے میں حصولِ تعلیم کے لیے داخل ہوئے ہیں، یہ ادارہ اپنی نوعیت کا واحد پاکستانی تحقیقی ادارہ ہے جہاں متعدد غیر ملکی محقیقین سمیت600سے زیادہ پی ایچ ڈی اورایم فل طالب علموں پر مشتمل اعلیٰ معیارکا پی ایچ ڈی پروگرام کامیابی سے چل رہا ہے۔

انہوں نے کہا کہ بین الاقومی مرکزکا ایم فل، پی ایچ ڈی پروگرام میرٹ پراُستوار ہے، انھوں نے کہا کہ اس پروگرام کے تحت نئے محقیقین نامیاتی کیمیا، تجزیاتی کیمیاء، طبعیاتی کیمیا، غیر نامیاتی کیمیاء، حیاتی نامیاتی کیمیاء، ٹیکسٹائل کیمسٹری، فارماکولوجی، اور مالیکیولر میڈیسن جیسے اہم شعبہ جات میں تحقیق کرنے کے مجاز ہوں گے۔