پی ایس ایل 6۔آن لائن ٹکٹس کی فروخت آج شروع ہوگی

پاکستان سپرلیگ6(پی ایس ایل)کے آن لائن ٹکٹس کی فروخت آج شروع ہوگی ،پہلے مرحلے میں کراچی کے مقابلوں کے ٹکٹ دستیاب ہوں گے۔

نجی ٹی وی کے مطابق پہلے مرحلے میں کراچی میچزکے ٹکٹس جاری کیے جائیں گے،کراچی میں 7 مارچ تک 20 میچ کھیلے جائیں گے، شائقین www.bookme.pk پر رجسٹریشن کرواکر ٹکٹ خرید سکتے ہیں۔۔

کوویڈ صورت حال میں صرف 20 فیصد تماشائیوں کو اسٹیڈیم  آکر میچز دیکھنے کی اجازت دی گئی ہے۔ اس طرح نیشنل اسٹیڈیم کراچی میں 6500 تماشائی ایک میچ دیکھ سکتے ہیں جبکہ قدافی اسٹیڈیم لاہور میں یہ گنجائش 4500 ہے، ایک شناختی کارڈ پر صرف ایک شخص ٹکٹ خرید سکتا ہے، بچوں کے ب فارم پر ٹکٹ کی بکنگ کروائی جاسکتی ہے۔

ٹکٹ پر شناختی کارڈ کے ساتھ کیو آر کوڈ درج ہوگا جس کو 3 مختلف مقامات پر اسکین کرواکر تماشائی اندر داخل ہوسکیں گے، شائقین پہلے آئیے پہلے پائیے کی بنیاد پر ٹکٹ حاصل کرسکیں گے۔ میچ والے دن وہی شخص اسٹیڈیم داخل ہوسکے گا جس کے نام پر ٹکٹ کی بکنگ ہوگی۔

پہلے مرحلے میں کراچی کے میچز کی بکنگ شروع کررہے ہیں،دوسرے مرحلے میں لاہورکے میچز کے لیے بھی جلد بکنگ کا آغازکردیں گے، دوسری طرف پی سی بی ذرائع کے مطابق ٹکٹ کے نرخ 500 سے 5000 تک رکھے جانے کا امکان ہے۔