کورونا کی بگڑتی صورت حال، وزیر اعظم نے اہم اجلاس طلب کرلیا

اسلام آباد: وزیراعظم عمران خان نے قومی رابطہ کمیٹی برائے کوویڈ 19 کا اجلاس طلب کرلیا۔
ذرائع کے مطابق وزیراعظم کی زیرصدارت اجلاس کل (بدھ کو) دن پونے دو بجے وزیراعظم ہاوس میں ہوگا۔ اجلاس میں ملک بھر کی کورونا صورت حال پر بریفنگ دی جائے گی۔
ذرائع کا کہنا ہے کہ وزیر اعظم کی جانب سے طلب کیے گئے کل کے اجلاس میں کورونا وائرس کی صورت حال کے پیش نظر اہم فیصلے متوقع ہیں۔
واضح رہے کہ ملک میں کورونا وبا کی تسیری لہر کی ہلاکت خیزی بڑھتی جارہی ہے۔ گزشتہ 24 گھنٹوں کے دوران ملک بھر میں کورونا سے مزید 100 افراد جاں بحق ہوگئے ہیں جس کے بعد اب اس وبا سے جاں بحق ہونے والے افراد کی تعداد مجموعی طور پر 14 ہزار 356 ہوگئی ہے۔ اس سے قبل گزشتہ برس 11 جون کو تقریباً 9 ماہ پہلے ایک دن میں 101 اموات ریکارڈ ہوئی تھیں۔
کورونا وبا کی روک تھام کے لیے اس سے قبل بھی این سی او سی کی ہدایات کے مطابق متعدد اضلاع میں اسمارٹ لاک ڈاؤن، تعلیمی اداروں کی بندش ، کاروباری اوقات میں کمی اور شادی کی تقریبات پر پابندی کے اقدامات کیے جاچکے ہیں جب کہ وزیر اعظم کورونا کی تیسری لہر سے متعلق اپنے خصوصی پیغام میں عندیہ دے چکے ہیں کہ ملک میں مکمل لاک ڈاؤن کرنے کے متحمل نہیں ہوسکتے۔