اسرائیل کے فضائی حملے۔ غزہ لہو لہو ہو گیا۔شہدا کی تعداد113 ہو گئی

اسرائیلی فوج نے غزہ پر تازہ فضائی حملے کیے ہیں جس میں ہلاکتوں کا بھی خدشہ ہے، فلسطینی حکام کے مطابق اسرائیلی فضائی حملوں میں شہید فلسطینیوں کی تعداد113 ہو گئی ہے، شہدا میں 31 بچے اور 15 خواتین بھی شامل ہیں جبکہ 621 افراد زخمی ہیں۔

الجزیرہ کے مطابق، غزہ کے شمالی علاقے میں اسرائیلی فضائی حملوں میں شہید ہونے والی خاتون اور ان کے تین بیٹوں کی لاشیں بھی ملبے سے برآمد کرلی گئی ہیں۔

نجی ٹی وی کے مطابق اسرا ئیلی فوج نے غزہ میں زمینی دستے بھیج کر حملہ کرنے کے اپنے ہی بیان کو دو گھنٹے بعد واپس لے لیا اورغزہ میں صیہونی فوج داخل ہونے کی تردید کردی۔غزہ سے فلسطینی تنظیم حماس کے راکٹ حملوں میں 7اسرائیلی ہلاک اور متعدد زخمی ہو چکے ہیں۔

ادھر فلسطین کی تازہ ترین صورتحال پر بلایا گیا آج ہونے والا سلامتی کونسل کا اجلاس امریکا نے موخر کروا دیا۔امریکہ نے اسرائیل کے لیے ٹریول ایڈوائزری بھی جاری کر دی ہے جس میں امریکی شہریوں کو اسرائیل کے طے شدہ سفر پر نظرثانی کرنے کی ہدایت کی گئی ہے۔