زلفی بخاری رنگ روڈ کے پلاٹ بیچنے اسرائیل گئے تھے۔ شاہد خاقان عباسی

مسلم لیگ (ن) کے سینئر رہنما اور سابق وزیرا عظم شاہد خاقان عباسی نے زلفی بخاری کے دورہ اسرائیل کے حوالے سے کہا کہ زلفی بخاری رنگ روڈ کے پلاٹ بیچنے اسرائیل گئے تھے۔

اسلام آباد مین احتساب عدالت کے باہر میڈیا سے گفتگو کرتے ہوئے کہا کہ حکومت گری ہوئی ہے، اس کا ہر لمحہ ملک پر بھاری ہے، حکومت جس راستے سے آئی تھی اسی راستے سے جائے گی۔

شاہد خاقان عباسی کا کہنا تھا کہ انرجی سیکٹر کو وفاقی وزرا نے تباہ کردیا ہے،اربوں ڈالر کا نقصان کرچکے، کابینہ نے 2 مرتبہ ٹرمینل بند کرنے فیصلہ کیا مگر بند نہیں کرسکے، کیا چیئرمین نیب کو وزرا نظر نہیں آتے ؟ نیب کو چاہئے کہ وفاقی وزرا پر کیسز بنائے ۔ہمیں کیسوں کی فکر نہیں، پہلے بھی بھگتے آئندہ بھی بھگت لیں گے، حکومتی نالائقی کی وجہ سے کراچی کی پوری انڈسٹری بند ہے۔

ان کا کہنا تھا کہ 60 فیصد بجلی کے منصوبے نواز شریف کے لگائے ہوئے ہیں، 40 فیصد بجلی ایل این جی سے پیدا ہو رہی ہے، ایل این جی نہیں خریدیں گے تو بجلی بند ہو جائے گی۔آج پاکستان کا کشمیر پر کیا موقف ہے پارلیمان میں بتایا جائے، کشمیر کے معاملے پر گو مگوں کی کیفیت نہیں ہونی چاہیے تھی۔

لیگی رہنما کا کہنا تھا کہ اگر الیکشن چوری ہی کرنا ہیں تو پاکستان کو بہت خطرات ہیں، الیکشن چوری ہونگے تو ملک کو خطرہ ہے۔

زلفی بخاری سے متعلق سوال کے جواب میں شاہد خاقان عباسی نے کہا کہ وہ رنگ روڈ کے پلاٹ بیچنے اسرائیل گئے تھے جس پر صحافی قہقے لگانے لگ گئے،انہوں نے کہا کہ اس کے علاوہ زلفی بخاری آتا کیا ہے۔