علیم ڈارریٹائرمنٹ کےبعد آئی سی سی پینل آف امپائرز میں نامزد

لاہور(اسپورٹس ڈیسک)پاکستان کرکٹ بورڈ نے علیم ڈار کو آئی سی سی انٹرنیشنل پینل آف امپائرز میں نامزد کر دیا ہے۔

تین بار آئی سی سی امپائر آف دی ایئر رہنے والے 54 سالہ علیم ڈار ،احسن رضا کی جگہ بین الاقوامی پینل میں شامل ہوئے ہیں جنہیں ترقی دے کر آئی سی سی ایلیٹ پینل آف امپائرز میں شامل کیا گیا ہے۔

عالمی پینل میں تقرری کے بعد علیم ڈار بین الاقوامی میچوں میں پاکستان کے ہوم انٹرنیشنل فکسچر کے ساتھ ساتھ آئندہ آئی سی سی میجر ایونٹس میں امپائرنگ کے اہل رہیں گے، ایونٹس میں آئی سی سی مینز کرکٹ ورلڈ کپ 2023، آئی سی سی مینز ٹی ٹوئنٹی ورلڈ کپ 2024 اور آئی سی سی چیمپئنز ٹرافی 2025 شامل ہیں۔

آئی سی سی کے ضوابط کے مطابق بین الاقوامی پینل کے میچ آفیشلز صرف بین الاقوامی میچوں میں امپائرنگ کرنے کے اہل ہیں۔ اس پینل میں میچ آفیشلز کو آئی سی سی ممبران نامزد کرتے ہیں

علیم ڈار، جنہیں 2004 میں ایلیٹ پینل میں شامل کیا گیا تھا، 439 بین الاقوامی میچوں میں امپائرنگ کر چکے ہیں، جن میں 145 ٹیسٹ، 225 ون ڈے اور 69 ٹی ٹوئنٹی شامل ہیں۔

انہوں نے پانچ آئی سی سی  مینز کرکٹ ورلڈ کپ، سات آئی سی سی  مینز T20 ورلڈ کپ اور پانچ آئی سی سی  چیمپئنز ٹرافی ایونٹس میں امپائرنگ کی ہے،