نیوٹرل وینیو نہ ملا تو ورلڈ کپ نہیں کھیلیں گے، نجم سیٹھی

لاہور(امت نیوز)چیئرمین پی سی بی مینجمنٹ کمیٹی نجم سیٹھی نے صاف کہہ دیا ہے کہ اگر ہمیں نیوٹرل وینیو نہ دیا گیا تو ورلڈکپ نہیں کھیلیں گے۔
انہوں نے کہا کہ بھارتی ٹیم ایشیا کپ کھیلنے پاکستان نہیں آتی تو ورلڈکپ میچز بھی ہائبرڈ ماڈل کے تحت ہوں گے۔
ان کا کہنا تھا کہ بھارت میں بھی دنگے چل رہے ہیں مگر کرکٹ کبھی نہیں رکی، بھارت کو پاکستان میں سیکیورٹی کا کوئی مسئلہ نہیں ہے۔
انہوں نے کہا کہ ورلڈکپ میں پاکستان کے میچز ہائبرڈ ماڈل کے تحت ہونے چاہئیں، ہائبرڈ ماڈل میں پاکستان کے ورلڈکپ میچز بنگلادیش میں ہونےچاہئیں۔
ان کا کہنا تھا کہ نیوٹرل وینیو ہماری ترجیحات میں شامل نہیں ہے، ہمیں ٹورنامنٹ کے گیٹ منی کی مد میں ملنے والے پیسوں میں حصہ چاہیے۔
نجم سیٹھی نے کہا کہ بی سی سی آئی سیاسی بنیاد پر باقی ٹیموں کو پاکستان میں کھیلنے سے روکے تو پھر ایشین کرکٹ کونسل نہیں چل سکتی۔
انہوں نے بتایا کہ بحرین میں ایشین کرکٹ کونسل اجلاس میں جے شا نے باقی ٹیموں سے پاکستان میں کھیلنے پر پوچھا تھا، کسی ٹیم نے بھی پاکستان میں کھیلنے پر اعتراض نہیں کیا تھا۔
نجم سیٹھی نے کہا کہ بھارت کی برج، باسکٹ بال، بلائنڈ کرکٹ ٹیم پاکستان آسکتی ہے تو کرکٹ ٹیم کیوں نہیں؟
انہوں نے کہا کہ سری لنکا کے اے سی سی کو لکھےجانے والے خط سے فرق نہیں پڑتا، ہم نے تب سری لنکا کا دورہ کیا جب وہاں پر بم دھماکے ہو رہے تھے، ہم ہمیشہ سری لنکا کا دورہ کرنے کو تیار رہے ہیں۔