متحدہ میں کچھ بیویوں نے شوہر وں کو بھائی کہا، فاروق ستار

کراچی: ایم کیو ایم پاکستان کے ڈپٹی کنوینر ڈاکٹر فاروق ستار نے ایم کیو ایم کے لیڈروں اور کارکنوں کے ساتھ لفظ’ بھائی‘ لگانے کو برابری کا رشتہ قرار دے دیا۔نجی ٹی وی کے پروگرام میں گفتگو کے دوران ان سے پوچھاگیاکہ ایم کیو ایم لیڈرز میں ایسا کیا ہے جو ان کے ساتھ لفظ ’بھائی‘ لگانا لازمی ہوجاتا ہے؟تو انہوں نے کہاایسا ہی ہے بلکہ ہماری پارٹی میں ایسا ہوچکا کہ اکثر تو بیویاں بھی اپنے شوہروں کو بھائی کہنے لگی ہیں۔ ہم نسرین جلیل کو نسرین جلیل باجی کہتے تھے تو لوگوں نے ان کے نام کے آگے بھی بھائی لگا کر ’نسرین جلیل باجی بھائی‘ کہنا شروع کردیا ، بھائی دراصل ایک صیغہ اور دو کارکنوں کے درمیان بھائی کاتعلق برابری کی بنیاد پر ہے کیونکہ چاچا بھتیجا کا تعلق برابری نہیں ہے لیکن بھائی کا تعلق برابری کا ہے۔

الیکشن میں اگلا وزیراعظم کسے دیکھتے ہیں کے سوال پر فاروق ستار کا کہنا تھا الیکشن ایک نہ ایک دن ضرورہونے ہیں، ہم سیاستدانوں کے زندہ رہنے کے لیے الیکشن بہت ضروری ہے، میری خواہش ہوگی بلاول بھٹو کے فارم ہاؤسز اور کھیتوں میں کام کرنے والے ہاری (کسان) کا بیٹا وزیراعظم بن جائے یا پی پی پی کا کوئی کارکن وزیراعظم بن جائے یا پھر میری خواہش ہے کہ مسلم لیگ (ن) کی انڈسٹریز میں کام کرنے والا کوئی ملازم وزیر اعظم بن جائے جو پڑھا لکھا ہو اور سیاسی سوجھ بوجھ بھی رکھتا ہو،میری خواہش ہے عوام میں سے کوئی وزیراعظم بن کر سامنے آئے۔