کراچی، دسویں جماعت سائنس گروپ کے نتائج کا اعلان

کراچی: ثانوی تعلیمی بورڈ کراچی نے دسویں جماعت سائنس گروپ کے نتائج کا اعلان کر دیا ہے ۔ کامیابی کا کل تناسب 86.30 رہا ہے ۔

تفصیلات کے مطابق ثانوی تعلیمی بورڈ کراچی نے دسویں جماعت سائنس گروپ کے نتائج کا اعلان کر دیا ہے ۔ نتائج کا اعلان سیکریٹری بورڈیونیورسٹی نور احمد سموں، چیئرمین انٹر بورڈ پروفیسر نسیم احمد میمن ‛ چیئرمین میٹرک بورڈ ڈاکٹر شرف علی شاہ ‛ ناظم امتحانات عمران طارق بٹ ‛ سیکریٹری میٹرک بورڈ نوید احمد سمیت دیگر افسران کی موجودگی میں ہومیو پیتھک کالج آڈیٹوریم ناظم آباد میں کیا گیا ۔

نتائج کے مطابق امسال 2023 میں میٹرک بورڈ دسویں جماعت سائنس گروپ میں کل 156068 طلبا و طالبات نے امتحانانی فارم جمع کرائے تاہم امتحانات میں 156022 امیدوار شریک ہوئے ۔ جس کے بعد 134646 طلبا و طالبات نے مجموعی طور پر کامیابی حاصل کی ہے ۔ یوں کامیابی کا کل تناسب 86.30 فیصد تھا۔

مجموعی طور پر اے ون گریڈ لینے والے طلبا کی تعداد 33967 ‛ اے گریڈ لینے والے طلبا کی تعداد 45080 ‛ بی گریڈ لینے والے طلبا کی تعداد 34250 ‛ سی گریڈ لینے والے طلبا کی تعداد 18033 اور D گریڈ میں پاس ہونے والے طلبا کی تعداد 3037 اور ای گریڈ میں پاس ہونے والے طلبہ کی تعداد 16 ہے ۔

پہلی پوزیشن شہیرا فاطمہ نے 1044 نمبر ‛ دوسری پوزیشن رابیسہ علی نے 1035 نمبر ‛ تیسری پوزیشن محمد عمیر اقبال انصاری نے 1031 نمبر حاصل کیے ۔

اس کے علاوہ جنرل گروپ ریگولر اور پرائیویٹ میں پہلی تین پوزیشن لینے والوں میں زیتون نے 926 نمبر ‛ دوسری پوزیشن سیدہ خضرا عامر نے 959 نمبر اور تیسری پوزیشن نشرہ نے 947 نمبر حاصل کیے  ۔
امتحان میں پوزیشن لینے والے طلبا و طالبات کو نقد انعامات سے نوازہ گیا ۔ جب کہ بورڈ میں نتائج کے مہمانان کو شیلڈ اور اجرک کے تحائف بھی پیش کیے گئے ۔
تقریب سے خطاب کرتے ہوئے چیئرمین میٹرک بورڈ ڈاکٹر شرف علی شاہ نے کہا کراچی ماڈل سٹی ہے اور میں اس شہر کے بورڈ کا چیئرمین ہوں ۔ بورڈ میں آنے والے تمام مہمانوں ‛ تعلیمی افسران سمیت والدین و اساتذہ کو خوش آمدید کہتا ہوں ۔

سیکریٹری بورڈ اینڈ یونیورسٹی نور احمد سموں کا کہنا تھا کہ مجھے خوشی ہے کہ میں طلبا کی اس تقریب میں آیا ہوں ۔ بورڈ کو ٹاپ کرنے والے طلبا کو مبارک باد پیش کرتا ہوں ۔ ہمارے تعلیمی سلسلے کا فوکس ہمارے طلبا ہی ہیں ۔ بچوں کیساتھ ساتھ اساتذہ اور والدین کیلیے بھی اعزاز ہے ۔ میں نتائج سے خوش ہوں کہ زیادہ طلبا کے نتائج اے ون گریڈ ہے ۔ میں نے بھی حیدر آباد بورڈ سے امتحان دیا تھا تو نتائج کے روز بہت خوش تھا ۔

پہلی پوزیشن شہیرا فاطمہ نے 1044 نمبر ‛ دوسری پوزیشن رابیسہ علی نے 1035 نمبر ‛ تیسری پوزیشن محمد عمیر اقبال انصاری نے 1031 نمبر حاصل کیے ۔