شمالی وزیرستان میں سیکیورٹی فورسز کا آپریشن،ایک دہشتگرد ہلاک

راولپنڈی: سیکیورٹی فورسز نے شمالی وزیرستان میں انٹیلی جنس کی بنیاد پر آپریشن کیا جس کے نتیجے میں ایک دہشت گرد نیکمان اللہ ہلاک ہو گیا۔آئی ایس پی آر کی جانب سے جاری بیان کے مطابق آپریشن کے دوران پاک فوج اور دہشت گردوں کے درمیان شدید فائرنگ کا تبادلہ ہوا جس میں نیکمان اللہ نامی دہشت گرد کو واصل جہنم کر دیا گیا۔ مارا گیا دہشت گرد معصوم شہریوں کی ٹارگٹ کلنگ اور دہشت گردی کی متعدد کارروائیوں میں سرگرم رہا۔ ہلاک دہشت گرد سے اسلحہ، گولہ بارود اور دھماکہ خیز مواد بھی برآمد ہوا ۔ علاقے میں دہشت گردوں کو ختم کرنے کیلئے سینی ٹائزیشن آپریشن جاری رہا۔ بیان میں مزید کہا گیا کہ پاکستان کی سکیورٹی فورسز ملک سے دہشت گردی کی لعنت کو ختم کرنے کیلئے پرعزم ہیں۔