صدارتی ایوارڈ یافتہ معروف موسیقار ذوالفقار علی عطرے انتقال کر گئے

لاہور: صدارتی ایوارڈ یافتہ موسیقار ذوالفقارعلی عطرے دل کا دورہ پڑنے سے خالق حقیقی سے جا ملے۔

مرحوم نے پاکستانی فلم انڈسٹری میں موسیقی کے میدان میں نمایاں خدمات سرانجام دیں اور اپنے کیریئرکے دوران 50 سے زائد فلموں کے گانوں کی موسیقی ترتیب دی۔

ذوالفقار علی عطرے نے پاکستانی موسیقی کی دنیا میں منفرد مقام حاصل کیا اور اپنی تخلیقی صلاحیتوں سے عوام کے دل جیتے۔ ان کی آخری فلم بطور میوزک ڈائریکٹر ’ویلکم پنجاب‘ ہے، جس کی عکسبندی اس وقت جاری ہے۔ ان کے کام کو ہمیشہ ان کے مداح اور فلم انڈسٹری یاد رکھے گی۔

مرحوم کو ان کی خدمات کے اعتراف میں 2024 میں حکومت پاکستان کی جانب سے ’پرائڈ آف پرفارمنس‘ ایوارڈ سے بھی نوازا گیا۔ ان کی شخصیت اور کام موسیقی کی دنیا کے لیے ہمیشہ قابلِ تقلید رہیں گے۔

ذوالفقار علی عطرے کی نماز جنازہ آج دوپہر ایک بجے ان کی رہائش گاہ، 304 خیبر بلاک، اقبال ٹاؤن سے ادا کی جائے گی۔ ان کے انتقال پر فلمی اور موسیقی کے حلقوں میں گہرے رنج و غم کا اظہار کیا جا رہا ہے۔ ان کی خدمات کو خراجِ تحسین پیش کرتے ہوئے ان کی یادوں کو ہمیشہ زندہ رکھا جائے گا۔