اسرائیلی فوج کی غزہ پر بمباری جاری، مزید 80 فلسطینی شہید

 

غزہ میں اسرائیلی فضائی اور زمینی حملوں کا سلسلہ بدستور جاری ہے۔ تازہ ترین اطلاعات کے مطابق، گزشتہ 24 گھنٹوں کے دوران مزید 12 فلسطینی شہید ہو گئے، جس کے بعد صرف ایک دن میں شہادتوں کی تعداد 80 تک پہنچ گئی ہے، جب کہ زخمیوں کی تعداد 304 رپورٹ کی گئی ہے۔

فلسطینی وزارت صحت کے مطابق اسرائیلی بربریت کے آغاز سے اب تک شہدا کی مجموعی تعداد 57 ہزار 418 ہو چکی ہے، جن میں بڑی تعداد خواتین اور بچوں کی ہے۔

ادھر خان یونس میں حماس اور اسرائیلی افواج کے درمیان شدید جھڑپیں جاری ہیں۔ اطلاعات کے مطابق جھڑپوں میں دو اسرائیلی فوجی ہلاک جبکہ متعدد زخمی ہو گئے ہیں، جب کہ کئی اسرائیلی ٹینک تباہ کیے جانے کی بھی تصدیق ہوئی ہے۔

حماس کے عسکری ونگ نے دعویٰ کیا ہے کہ ان کے مجاہدین نے دشمن کی پیش قدمی کو روکنے میں کامیابی حاصل کی ہے، اور کئی محاذوں پر شدید مزاحمت جاری ہے۔